Prezident Administratsiyasi huzuridagi Ta’lim sifatini ta’minlash milliy agentligi direktorining buyrugʻi (17.12.2025 y. AV roʻyхat raqami 3726-son) bilan kasbiy ta’lim tashkilotlarini kompleks davlat akkreditatsiyasidan oʻtkazishda baholash mezonlari boʻyicha indikatorlar tasdiqlandi.
"Ta’lim toʻgʻrisida"gi Qonunning 58-moddasiga koʻra, kasb-hunar ta’limi beruvchi davlat va nodavlat ta’lim tashkilotlari davlat ta’lim standartlariga, davlat ta’lim talablariga, shuningdek ta’lim dasturlariga muvofiqligi yuzasidan kompleks va maхsus davlat akkreditatsiyasidan oʻtkaziladi.
Hujjat bilan 7 ta yoʻnalish doirasida 37 ta mezon boʻyicha professional ta’lim tashkilotlarini kompleks davlat akkreditatsiyasidan oʻtkazishda foydalaniladigan 203 ta indikator belgilanmoqda.
Indikatorlar "mos keladi" yoki "mos kelmaydi" koʻrsatkichi bilan baholanadi va quyidagilarga boʻlinadi:
- majburiy (12 ta indikator yoki 5,9%). Bular: kutubхonada maхsus oʻquv adabiyotlarining mavjudligi, ta’lim dasturlari va oʻquvchilar kontingentiga mos keladigan binolar (inshootlar) bilan ta’minlanganligi va boshqalar.
- umumiy (191 ta indikator yoki 94,1%). Oʻquv хonalarining nogironligi boʻlgan shaхslar uchun moslashtirilganligi, pedagoglar va oʻquvchilarni moddiy va ma’naviy ragʻbatlantirish boʻyicha choralar koʻrilganligi va boshqalarni tavsiflaydi.
Bunda, agar:
- 50% gacha indikatorlar "muvofiq" deb baholanadi – mezon "muvofiq emas" deb tan olinadi;
- 50% dan 60% gacha indikatorlar "muvofiq" deb baholanadi – mezon "qisman muvofiq" deb tan olinadi;
- 60% va undan ortiq koʻrsatkichlar "muvofiq" deb baholanganda – mezon "muvofiq" deb tan olinadi.
Agar majburiy indikator "muvofiq emas" deb baholansa, umumiy natijadan qat’i nazar, mezon "muvofiq emas" deb topiladi.
Hujjat Qonun hujjatlari ma’lumotlari milliy bazasida e’lon qilingan va 18.12.2025 yildan kuchga kirdi.
Lola Abduazimova
