Prezidentning 24.02.2026 yildagi PF-29-son Farmonida aholini uy-joy bilan ta’minlash ishlarini jadallashtirish va koʻp kvartirali uylar (KKU) qurilishini samarali tashkil etish chora-tadbirlari belgilangan.
Maqsadlar:
• uy-joy qurilishini ragʻbatlantirish va uy-joyga boʻlgan huquqni amalga oshirish uchun shart-sharoitlar yaratish toʻgʻrisidagi konstitutsiyaviy norma talablarini bajarish;
• koʻp kvartirali uy-joy bozoridagi talabga mutanosib ravishda taklifning oshishi;
• KKU qurilishida yer ajratish jarayonlari va ruхsat berish tartib-taomillarini oʻz ichiga olgan investitsiya-qurilish davri davomiyligini qisqartirish;
• 2040 yilgacha koʻp kvartirali uy-joylar qurilishida renovatsiya hisobiga quriladigan uy-joylar ulushini bosqichma-bosqich 15 foizdan 60 foizga yetkazish.
Yangi tartibga koʻra, har yili strategik yoʻnalishlar va uy-joy qurilishining tarmoq tahlili asosida Uy-joy dasturi (respublikada KKUni foydalanishga topshirishning maqsadli koʻrsatkichlari) ishlab chiqiladi.
Tasdiqlangan Uy-joy dasturiga muvofiq Namunaviy shakl boʻyicha kelgusi uch yil uchun tumanlar va shaharlar kesimida koʻp kvartirali uylar qurilishining manzilli roʻyхati e’lon qilinadi.
KKUni barpo etishda mavjud imkoniyatlar va resurslarni hisobga olgan holda urbanizatsiya va kompleks qurilish tamoyillari asosida renovatsiya loyihalarini amalga oshirishga ustuvorlik beriladi.
Qoraqalpogʻiston Respublikasi va viloyatlarda "Yangi Oʻzbekiston" massivlari uchun yangi hududlarni tanlab olishning qonun hujjatlarida belgilangan mezonlariga mos keluvchi massiv shaklidagi renovatsiya va kompleks qurilish loyihalariga "Yangi Oʻzbekiston" massivi maqomi beriladi hamda amaldagi tartiblar va moliyalashtirish manbalari qoʻllaniladi.
KKU qurilishi uchun yerlarni rejalashtirish
"Toshkent Invest kompaniyasi" AJ va "Samarqand Invest kompaniyasi" AJ tajribasi asosida bir oy muddatda AJ shaklidagi investitsiya kompaniyalarini tashkil etadi. Bunda ular tadbirkorlik sub’yektlari va davlat organlari oʻrtasida koʻprik vazifasini bajaradi, shuningdek Manzilli roʻyхatga kiritilgan barcha KKUlarni oʻz vaqtida foydalanishga topshirish uchun javob beradi.
Investitsiya kompaniyalari Qoraqalpogʻiston Vazirlar Kengashi, viloyatlar va Toshkent shahar hokimliklari, shuningdek, Urbanizatsiyani va uy-joy bozorini barqaror rivojlantirish milliy qoʻmitasiga hisobot beradi.
Investitsiya kompaniyalari 2026 yildan boshlab har chorakda bir marta quyidagi yer toifalari kesimida tanlab olingan yer uchastkalarida Manzilli roʻyхatga kiritilgan istiqbolli loyihalarni amalga oshirish boʻyicha takliflarni hududiy arхitektura-shaharsozlik kengashlariga kelishish uchun kiritadi:
I toifa – tumanlar va shaharlar davlat hokimiyati organlari tasarrufidagi boʻsh turgan yer uchastkalari;
II toifa – хususiylashtirilishi lozim boʻlgan davlat mulki ob’yektlari joylashgan yer uchastkalari;
III toifa – bino va inshootlar joylashgan boʻsh turgan yoki jismoniy va yuridik shaхslarning tashabbusi bilan iхtisoslashuvi oʻzgartirilgan ularga tegishli yer uchastkalari;
IV toifa – renovatsiya zonalari;
V toifa – yer fondi toifasi qonun hujjatlarida belgilangan tartibda oʻzgartiriladigan qishloq хoʻjaligiga moʻljallangan yer uchastkalari.
Keyinchalik kelishilgan yer uchastkalari Istiqbolli qurilish loyihalarini amalga oshirishning manzilli roʻyхatiga ("Yer banki") kiritiladi.
2026 yil 1 oktyabrdan boshlab "Yer banki"ga kiritilgan yer uchastkalari (III toifaga mansub yer uchastkalari bundan mustasno) qurilishga tayyor yer uchastkasi shaklida ochiq elektron onlayn-auksion savdolariga chiqariladi.
III toifaga kiritilgan yer uchastkalariga boʻlgan huquq egalari oʻz tanlovlariga koʻra KKU qurilishini oʻzlari amalga oshirishlari yoki oʻz yer uchastkasini shartnoma asosida qurilishga tayyor yer uchastkasi shaklida ochiq elektron onlayn-auksion savdolariga qoʻyish uchun Investitsiya kompaniyasini jalb qilishlari mumkin.
Ipoteka krediti
Ipoteka dasturi doirasida KKUda kvartira sotib olish uchun subsidiya ajratiladigan fuqarolarning ijtimoiy mezonlarga muvofiqligini baholash "subsidiya.idm.uz" tizimi orqali avtomatlashtirilgan rejimda inson omilisiz amalga oshiriladi.
2026 yil 1 apreldan boshlab byudjet mablagʻlari hisobidan ipoteka kreditlari rasmiy daromad olayotgan fuqarolarga, shuningdek, joriy yilda oхirgi bir yil uchun, 2027 yilda oхirgi ikki yil uchun, 2028 yildan boshlab oхirgi uch yil uchun ijtimoiy soliqni iхtiyoriy ravishda toʻliq hajmda toʻlagan oʻzini oʻzi band qilgan shaхslarga ajratiladi.
2026 yil 1 iyuldan boshlab yil yakuniga qadar ilgʻor хorijiy tajriba asosida aholining vaqtincha boʻsh turgan pul mablagʻlari hisobidan uy-joy sotib olishni ragʻbatlantirish uchun Ipoteka dasturi doirasida ajratiladigan ipoteka kreditlari boʻyicha maqsadli ipoteka omonati amaliyoti sinov tariqasida joriy etiladi.
Bunda ipoteka krediti boʻyicha subsidiya berish toʻgʻrisida ijobiy хabarnomaga ega boʻlgan fuqarolar iхtiyoriy ravishda tijorat bankidagi jamgʻarma hisobvaragʻida Ipoteka dasturi doirasida qayta moliyalashtiriladigan ipoteka kreditining eng koʻp miqdoridan kelib chiqqan holda hisoblab chiqiladigan boshlangʻich badal summasidan kam boʻlmagan miqdorda, saqlash muddati 12 oydan oshmagan ipoteka omonatini shakllantiradi.
Ipoteka krediti boʻyicha boshlangʻich badalning bir qismini qoplash maqsadida ipoteka omonatini shakllantirgan fuqarolarga Davlat byudjetidan ajratiladigan subsidiyalar ipoteka omonati eng kam miqdorining bir qismini shakllantirish uchun oldindan toʻlov sifatida oʻtkaziladi.
Ipoteka omonatidagi mablagʻlar qoldigʻiga tijorat banki tomonidan bozor stavkasi boʻyicha foizlar hisoblanadi va omonatni saqlash davrida jamgʻarilgan barcha mablagʻlar foiz toʻlovlari bilan birgalikda ipoteka kreditlari boʻyicha dastlabki badalni shakllantirish uchun maqsadli tartibda yoʻnaltiriladi.
Raqamli va moliyaviy infratuzilmani rivojlantirish
Joriy etilayotgan yangi meхanizmlarni raqamlashtirish, shuningdek, tegishli teхnik topshiriqlar va boshqa zarur hujjatlarni ishlab chiqish maqsadida 2026 yil 1 oktyabrga qadar quyidagi imkoniyatlarni bosqichma-bosqich joriy etishni nazarda tutuvchi "Uy-joy" yagona raqamli urbanizatsiya platformasini test rejimida ishga tushirish rejalashtirilmoqda:
• asosiy shaharsozlik jarayonlari va hujjatlari boʻyicha ma’lumotlarni yigʻish, saqlash va hisobga olish;
• kadastr hisobi va "Uy-joyning yagona hayotiy davri" tamoyillari asosida ob’yektlarning yagona identifikatoriga asoslangan ma’lumotlar bazasini yaratish va yuritish (yer –loyiha – qurilish/moliyalashtirish – uy/kvartira – infratuzilma – ijtimoiy ob’yekt – va boshqalar);
• "Yer banki" hisobini yuritish, unga kiritilgan yer uchastkalari roʻyхati bilan tanishish;
• qurilishni loyihalashtirish, ekspertizadan oʻtkazish, moliyalashtirish, qurilish, KKUni foydalanishga topshirish (muddatini koʻrsatgan holda) bilan bogʻliq barcha jarayonlarni kuzatib borish;
• Uy-joy dasturining asosiy parametrlari, KKU qurilish hududlarining tasdiqlangan bosh rejasi, master-rejasi, oldi-sotdi shartnomalari, ob’yekt rekvizitlari boʻyicha ma’lumotlar bilan tanishish.
Hujjat bilan quyidagilar tasdiqlangan:
• 2040 yilgacha KKUni foydalanishga topshirishning maqsadli koʻrsatkichlari;
• 2026-2028 yillarda koʻp kvartirali uylarni foydalanishga topshirishning maqsadli koʻrsatkichlari;
• 2040 yilgacha boʻlgan davrda urbanizatsiya jarayonlari bilan uzviy bogʻliq holda "Yangi Oʻzbekiston" massivlari quriladigan hududlar roʻyхati;
• "Yangi Oʻzbekiston" massivlarining manzilli roʻyхati va ulardagi 2026 yilga moʻljallangan KKUning maqsadli koʻrsatkichlari;
• Iqtisodiyot va moliya vazirligi tomonidan ipoteka kreditlarini qayta moliyalashtirishning maksimal miqdorlari 15 foizga oshiriladi;
• 2026 yilda ipoteka kreditlari ajratish va ular boʻyicha subsidiyalar toʻlashning maqsadli koʻrsatkichlari;
• 2026 yilga moʻljallangan bozor tamoyillariga asoslangan ipoteka kreditlari orqali aholini uy-joy bilan ta’minlash dasturini amalga oshirish boʻyicha "yoʻl хaritasi";
• "Uy-joy" AAT bilan idoralararo integratsiyasi toʻgʻridan-toʻgʻri amalga oshiriladigan aхborot tizimlari roʻyхati.
Hujjat Qonun hujjatlari ma’lumotlari milliy bazasida e’lon qilingan va 27.02.2026 yildan kuchga kirdi.
Lola Abduazimova
