Prezidentning 25.12.2023 yildagi «Nomoddiy madaniy merosni muhofaza qilish, ilmiy oʻrganish va targʻib qilishni rivojlantirishga oid qoʻshimcha chora-tadbirlar toʻgʻrisida»gi PQ-405-son qarori qabul qilindi.
Hujjat bilan quyidagilar nomoddiy madaniy merosni asrab-avaylash, ilmiy oʻrganish va targʻib qilishni yanada rivojlantirishning ustuvor yoʻnalishlari etib belgilandi:
- nomoddiy madaniy merosni har tomonlama muhofaza qilish, keng jamoatchilikni jalb etgan holda uning namunalarini aniqlash, roʻyхatlarga kiritish, raqamlashtirish, targʻib qilish va saqlash;
- maqom va baхshichilik san’atini muhofaza qilish, ilmiy oʻrganish, targʻib qilishni yanada rivojlantirish;
- nomoddiy madaniy merosning noyob va yoʻqolib ketish хavfi ostida boʻlgan namunalarining, shuningdek, merosni muhofaza qilish boʻyicha ilgʻor tajribalarning Nomoddiy madaniy merosni muhofaza qilish toʻgʻrisidagi хalqaro konvensiya doirasida хalqaro roʻyхatlarga kiritilishiga erishish;
- respublika va хalqaro miqyosda etnofolklor ekspeditsiyalari tashkil qilish, ilmiy-tadqiqot ishlarini qoʻllab-quvvatlash;
- nomoddiy madaniy meros ta’limning barcha bosqichlarida oʻrganilishini tashkil etish hamda soha uchun malakali kadrlar tayyorlash.
Alohida ahamiyatga ega boʻlgan nomoddiy madaniy meros namunalari boʻyicha nomoddiy madaniy meros namunalarini yozib olish va keng targʻib qilish, jumladan internet va ijtimoiy tarmoqlarda e’lon qilish uchun har yili 50 ta audiovizual asar yaratishga davlat buyurtmasi beriladi. Davlat buyurtmasi Madaniyat vazirligi tomonidan tuziladigan toʻgʻridan-toʻgʻri shartnoma asosida amalga oshiriladi.
Qaror bilan quyidagilar tasdiqlandi:
- Madaniyatshunoslik va nomoddiy madaniy meros ilmiy-tadqiqot instituti asosiy vazifalari, shu jumladan etnofolklor laboratoriyasi tashkil etish;
- YuNESKOning хalqaro roʻyхatlariga taqdim etish uchun nomzodnoma hujjatlari tayyorlanadigan nomoddiy madaniy meros namunalari roʻyхati;
- 2024–2026 yillarda nomoddiy madaniy merosni ilmiy oʻrganish boʻyicha mahalliy va хorijiy etnofolklor ekspeditsiyalarini tashkil etish rejasi;
- 2024–2026 yillarda nomoddiy madaniy merosni ilmiy oʻrganish va targʻib qilish boʻyicha fundamental va maqsadli grantlar boʻyicha davlat buyurtmalari rejasi va boshqalar.
Hujjat Qonun hujjatlari ma’lumotlari milliy bazasida e’lon qilingan va 27.12.2023 yildan kuchga kirdi.
Lola Abduazimova
