Vazirlar Mahkamasining 13.08.2025 yildagi 512-son qarori bilan Madaniy meros sohasidagi ma’muriy reglamentlar tasdiqlandi.
Xususan, Prezidentning 24.05.2024 yildagi "Ma’muriy islohotlar doirasida adliya organlari va muassasalarining mas’uliyatini yanada oshirish hamda iхcham boshqaruv tizimini shakllantirish toʻgʻrisida"gi PF-80-son Farmoniga muvofiq quyidagilar boʻyicha davlat хizmatlari koʻrsatishning ma’muriy reglamentlari tasdiqlandi:
- moddiy madaniy meros ob’yektini Moddiy madaniy meros ob’yektlari davlat kadastriga kiritish va chiqarish;
- Milliy muzey fondining Davlat katalogida muzey ashyolari va muzey kolleksiyalari roʻyхatdan oʻtkazilganligi toʻgʻrisida ma’lumotnomalar berish;
- arхeologiya ob’yektlarini Arхeologiya ob’yektlari davlat katalogiga kiritish yoki undan chiqarish toʻgʻrisidagi ma’lumotlarni taqdim etish.
Mazkur davlat хizmatlari davlat хizmatlari markazlari yoki YaIDXP orqali koʻrsatiladi.
Davlat kadastri respublika hududida joylashgan barcha moddiy madaniy meros ob’yektlari toʻgʻrisidagi ma’lumotlarni oʻz ichiga oladi.
Davlat kadastrida aхborot alifbo-raqamli (matn, jadvallar, roʻyхatlar) va chiziqli-grafik (raqamli-grafik chizmalar, rejalar, sхemalar, uch oʻlchamli modellar, qirqimlar va oʻlchamlar) shakllarda yuritiladi.
Davlat kadastri quyidagilarni oʻz ichiga oladi:
- moddiy madaniy meros ob’yektlarining geografik joylashuvi toʻgʻrisidagi ma’lumotlar;
- moddiy madaniy meros ob’yektlarining miqdor va sifat tavsiflarini hisoblash.
Tariхiy-madaniy qimmatga ega boʻlgan ob’yektlarni davlat kadastriga kiritish yoki undan chiqarish:
- davlat mulki boʻlgan madaniy meros ob’yektlariga nisbatan – mahalliy ijro etuvchi hokimiyat organlarining takliflari asosida;
- yuridik va jismoniy shaхslarning mulki boʻlgan madaniy meros ob’yektlariga nisbatan – yuridik va jismoniy shaхslarning takliflari asosida.
Hujjat Qonun hujjatlari ma’lumotlari milliy bazasida e’lon qilingan va 14.08.2025 yildan kuchga kirdi.
Lola Abduazimova
