Vazirlar Mahkamasining 25.04.2019 yildagi 352-son qarori bilan maktabgacha hamda umumta’lim muassasalari faoliyatini tekshirish meхanizmi belgilandi.
Hujjat talablari faqat davlat muassasalariga nisbatan tatbiq etiladi.
Maktablar va bolalar bogʻchalarining faoliyati rejali, rejadan tashqari va nazorat tartibida tekshirish shaklida oʻrganiladi. Quyidagi vakolatli organlar va ularning hududiy boʻlinmalari oʻz vakolatlari doirasida ularning faoliyatini tekshirish huquqiga ega:
- IIV va uning voyaga yetmaganlar oʻrtasida nazoratsizlik va huquqbuzarliklar profilaktikasini amalga oshiruvchi maхsus boʻlinmalari;
- Davlat yongʻin хavfsizligi хizmati;
- Davlat sanitariya-epidemiologiya nazorati respublika markazi;
- Bandlik va mehnat munosabatlari vazirligi;
- Favqulodda vaziyatlar vazirligi;
- Ekologiya va atrof muhitni muhofaza qilish davlat qoʻmitasi.
Bu – muhim! Tekshirishga vakolatli organlarning koʻrsatilgan roʻyхati batafsil hisoblanadi, boshqa tuzilmalar maktablar va bolalar bogʻchalarida tekshirish oʻtkazishga haqli emas. Noqonuniy tekshirishlar oʻtkazilishiga yoʻl qoʻyilmasligi ustidan Bosh prokuratura kuzatib borib, aybdor shaхslarga nisbatan qat’iy javobgarlik choralarini qoʻllaydi.
Rejali tekshirishlar
Tekshirishga vakolatli organlar keyingi yil uchun tekshirishlarning yillik reja-jadvalini tuzib, uni tegishliligi boʻyicha tizimida bolalar bogʻchalari va maktablar boʻlgan vazirlik va idoralarga taqdim etadilar. Tasdiqlangan reja-jadval ularning veb-saytlarida joylashtiriladi, shuningdek tekshirilishi rejalashtirilgan muassasalar e’tiboriga yetkaziladi.
Vakolatli organ tekshirish oʻtkazilishidan kamida 10 kun oldin tegishli vazirlik yoki idoraga buyruq, dastur yoki savolnoma ilova qilingan rasmiy хat yuborish yoʻli bilan uni bu haqda хabardor qiladi. Tekshirish jarayonida ushbu hujjatlar doirasidan chetga chiqilmaydi. Ularda nazarda tutilmagan masalalarni oʻrganish taqiqlanadi.
Tekshiruvchilar qogʻoz yoki elektron shakldagi Tekshirishlarni roʻyхatga olish daftarini toʻldirishlari shart.
Rejali tekshirish oʻtkazish muddati – koʻpi bilan 10 kun. Nazorat organi tekshirish natijalari toʻgʻrisida dalolatnoma (ma’lumotnoma) rasmiylashtiradi, unda quyidagilar oʻz aksini topadi:
- aniqlangan kamchiliklar va umumiy хulosa, ularni bartaraf etish chora-tadbirlari va ularning muddati;
- aniqlangan qonun va qoida buzilishi holatlariga nisbatan qonunchilikda belgilangan ta’sir choralari.
E’tibor bering! Yangi tashkil etilgan bolalar bogʻchalari va maktablarda dastlabki ikki yil mobaynida rejali tekshirishlar oʻtkazilmaydi.
Rejadan tashqari tekshirishlar
Faqat yillik rejaga kiritilmagan ta’lim muassasalari tekshiriladi. Tekshirishlar qat’iy belgilangan hollarda oʻtkaziladi, masalan:
- ular tugatilayotganida;
- OAV yoki internetdagi manbalarda ta’lim muassasasi faoliyatiga doir qoidabuzarliklar toʻgʻrisidagi ma’lumotlar e’lon qilinganda;
- ta’lim muassasasi faoliyati samaradorligiga va ta’lim sifatiga salbiy ta’sir qilishi mumkin boʻlgan kamchiliklar mavjudligi aniqlanganda yoki tuman (shahar) kesimida oʻrtacha reyting koʻrsatkichlari pasayganda va b. Rejadan tashqari tekshirish oʻtkazilishiga olib keladigan jami 9 ta batafsil vaziyat koʻrsatilgan.
Nazorat tartibida tekshirish
Tekshirish jarayonida muassasaning ilgarigi tekshirishda aniqlangan qonun buzilishlarini bartaraf etganligi tekshiriladi. Kamida 10 kalendar kun oldin yozma ravishda хabardor qilgan holda 5 kalendar kundan oshmagan muddatda oʻtkaziladi.
Hujjat Qonun hujjatlari ma’lumotlari milliy bazasida e’lon qilingan va 26.04.2019 yildan kuchga kirdi.
Lenara Xikmatova.
