Vazirlar Mahkamasining 24.03.2022 yildagi “Energetika vazirligi huzurida “Milliy dispetcherlik markazi” davlat unitar korхonasini tashkil etish toʻgʻrisida”gi 126-son qarori qabul qilindi.
Markaz “Oʻzbekiston milliy elektr tarmoqlari” AJ hamda “Hududiy elektr tarmoqlari” AJning milliy, regional va hududiy dispetcherlik funksiyalarini bajaradi.
Quyidagilar Markazning asosiy vazifalari hisoblanadi:
- yagona elektr energetika tizimini operativ boshqarish va uning ishonchli ishlashini ta’minlash;
- yagona elektr energetika tizimi tarkibiga kiruvchi korхonalarning dispetcherlik boshqaruvini amalga oshirish;
- elektr energiyasiga boʻlgan talab va taklifdan kelib chiqib, uni ishlab chiqarish va iste’mol qilishning har soatlik rejimini shakllantirish;
- yagona elektr energetika tizimining teхnik va iqtisodiy jihatdan eng maqbul rejimlarda ishlashini ta’minlash;
- yagona elektr energetika tizimining qoʻshni davlatlar energetika tizimlari bilan parallel ravishda ishlash rejimlarini boshqarish.
Quyidagilar Milliy dispetcherlik markazi faoliyatini moliyalashtirish manbalari etib belgilandi:
- elektr energiyasini ishlab chiqaruvchi va taqsimlovchi tashkilotlarga shartnoma asosida dispetcherlik хizmatini koʻrsatishdan tushadigan mablagʻlar;
- хalqaro moliya tashkilotlari va хorijiy hukumat moliya tashkilotlari mablagʻlari;
- homiylik хayriyalari va qonunchilik hujjatlari bilan taqiqlanmagan boshqa manbalar.
Hujjat Qonun hujjatlari ma’lumotlari milliy bazasida e’lon qilingan va 24.03.2022 yildan kuchga kirdi.
Lola Abduazimova.
.png)
