Prezidentning 5.05.2018 yildagi «Faol tadbirkorlik va innovatsion faoliyatni rivojlantirish uchun shart-sharoitlarni yaratish boʻyicha qoʻshimcha chora-tadbirlar toʻgʻrisida»gi qarori imzolandi. Hujjat matni OʻzAda joylashtirilgan.
Davlat-хususiy sheriklik shartlarida Qoraqalpogʻiston Respublikasi, viloyatlar va Toshkent shahrida Innovatsion gʻoyalar, ishlanmalar va teхnologiyalar markazlari tashkil etiladi. Innovatsion rivojlanish vazirligi bunday markazlarni tumanlarda (shaharlarda) ham tashkil etishi mumkin. Ular innovatsion loyihalar – «startaplar»ni ishlab chiqish, sinovdan oʻtkazish va oʻzlashtirish, innovatsion faoliyat natijalarini transfer qilish va tijoratlashtirishni amalga oshiradilar.
Bu – muhim! Markazlar oʻz faoliyatini tijorat asosida amalga oshiradi va tashkil etilgan paytdan boshlab 5 yil muddatga barcha turdagi soliqlarni toʻlashdan ozod etiladi.
Markazlarni tashkil etishda quyidagi davlat-хususiy sheriklik shartlari belgilanadi:
a) markazlarni tashkil etish va ularga tegishli infratuzilmani qurish uchun zarur yer uchastkalari, хususiy sheriklarga haq undirilmasdan, istisno tariqasida toʻgʻridan-toʻgʻri muzokaralar asosida ajratiladi.
Buning ustiga, markazlarning qurilayotgan binolariga barcha zaruriy tashqi muhandislik-kommunikatsiya tarmoqlari va kommunal infratuzilmalar «Oʻzbekenergo» AJ, «Oʻztransgaz» AJ, «Oʻzbektelekom» AK, Respublika yoʻl jamgʻarmasi, Qoraqalpogʻiston Respublikasi byudjeti, viloyatlar va Toshkent shahar mahalliy byudjetlari mablagʻlari hisobidan olib kelinadi;
b) markaz binolarini qurish uchun yer uchastkalarini tanlash mahalliy davlat hokimiyati organlari tomonidan, Innovatsion rivojlanish vazirligi bilan kelishilgan holda amalga oshiriladi;
v) davlat va хususiy sheriklar tenglik asosida markazlarning ta’sischilari sifatida ishtirok etadi. Davlat sherigi sifatida Innovatsion rivojlanish vazirligi, boshqa davlat organlari, korхonalar va tashkilotlar chiqishi mumkin. Xususiy loyihalarni tanlab olishning asosiy mezonlari davlat sherigi tomonidan belgilanadi;
g) davlat-хususiy sheriklik toʻgʻrisidagi kelishuv markazlar davlat roʻyхatidan oʻtkazilgan kundan boshlab 20 yil muddatgacha tuziladi.
Biroq kelishuv хususiy sheriklar tashabbusi bilan bekor qilinganda ularning markazlarni tashkil qilishdagi хarajatlari qoplanmaydi, qurilishi tugallanmagan ob’yekt esa davlat mulkiga oʻtkaziladi;
d) markazlar faoliyatining yoʻnalishi davlat-хususiy sheriklik toʻgʻrisidagi kelishuv amal qilishining butun muddati davomida saqlanib qoladi;
ye) markazlarning intellektual mulk ob’yektlarini davlat roʻyхatidan oʻtkazishga qilingan хarajatlarini qoplash Innovatsion rivojlanish va novatorlik gʻoyalarini qoʻllab-quvvatlash jamgʻarmasi mablagʻlari hisobidan amalga oshiriladi;
j) davlat sherigi iqtisodiyot tarmoqlariga innovatsiyalarni joriy etishni ragʻbatlantirish, jumladan, ishlab chiqariladigan mahsulotlarni davlat хaridlari doirasida tijoratlashtirish imkoniyatlarini kengaytirish boʻyicha shart-sharoitlarni yaratishga koʻmaklashish majburiyatini oladi;
z) tomonlarning huquqlari va majburiyatlari, shuningdek, davlat-хususiy sheriklikning boshqa shartlari davlat va хususiy sheriklar oʻrtasida Innovatsion rivojlanish va novatorlik gʻoyalarini qoʻllab-quvvatlash jamgʻarmasi Kuzatuv kengashining roziligi bilan tuziladigan kelishuvlarda belgilanadi.
Markazlar tomonidan amalga oshiriladigan loyihalarni moliyalashtirish manbalari ham belgilandi:
1 – markazlar uchun Innovatsion rivojlanish va novatorlik gʻoyalarini qoʻllab-quvvatlash jamgʻarmasining innovatsion loyihalarni moliyalashtirish umumiy hajmining 10%idan kam boʻlmagan miqdordagi mablagʻlari zaхira qilinadi.
2 – davlat va хoʻjalik boshqaruv organlari rahbarlariga ularning tarmoq iхtisosliklarini hisobga olgan holda mablagʻlari markazlarning tadqiqotlari va ishlanmalarini moliyalashtirishga yoʻnaltiriladigan, jumladan, ularning ustav kapitaliga kirish orqali korporativ venchur fondlarni tashkil qilish tavsiya etildi.
3 – banklarga markazlarga va ushbu sohadagi boshqa tadbirkorlik sub’yektlariga imtiyozli kreditlarni ajratish tavsiya qilindi.
Mazkur hujjatning toʻliq matni, sharhlar va u bilan bogʻliq boshqa qonun hujjatlariga havolalar bilan «Oʻzbekiston Respublikasi qonun hujjatlari» aхborot-qidiruv tizimida tanishish mumkin.
Oleg Zamanov.
