Muddatli harbiy хizmatga – tanlov boʻyicha

Tanlovga chaqirilish muddatini kechiktirish va chaqirilishdan ozod etish huquqiga ega boʻlmagan, sogʻligʻining holatiga koʻra harbiy хizmatni oʻtashga yaroqli deb topilgan chaqiriluvchilar jalb qilinadi.

Chaqiriluvchilar har yilgi tanlovda faqat bir marta ishtirok etishi mumkin.

Chaqiriluvchilarning umumjismoniy tayyorgarligini aniqlash boʻyicha sinovlar 25 sentyabrdan kelgusi yilning 15 yanvarigacha mudofaa organlari tomonidan, ularning bilim darajasini aniqlash boʻyicha test sinovlari esa 10 oktyabrdan kelgusi yilning 15 yanvarigacha Davlat test markazi tomonidan oʻtkaziladi.

Jismoniy imtihonlar

Chaqiriluvchilarning umumjismoniy tayyorgarlik darajasi 15 balli shkala boʻyicha baholanadi.

Chaqiriluvchilar quyidagi ketma-ketlikda umumjismoniy normativlarni bajaradi:

1) turnikda tortilish (11 marta va undan koʻp – «a’lo», 9-10 marta – «yaхshi», 6-8 marta – «qoniqarli», 0-5 marta – «qoniqarsiz»);

2) 100 metrga yugurish (14,2 soniya ichida – «a’lo», 14,3-14,6 soniya ichida – «yaхshi», 14,7-15,8 soniya ichida – «qoniqarli», 15,9 soniya va undan koʻp vaqtda – «qoniqarsiz»);

3) 3 000 metrga yugurish (12,45 daqiqa ichida – «a’lo», 12,46-13,0 daqiqa ichida – «yaхshi», 13,1-13,35 daqiqa ichida – «qoniqarli», 13,36 daqiqa va undan koʻp vaqtda – «qoniqarsiz»).

Barcha turdagi umumjismoniy normativlar bir kunda bajariladi. Normativlar oraligʻida dam olish uchun kamida 10 daqiqa vaqt beriladi.

Umumjismoniy tayyorgarlik sinovlarida birinchi marta qoniqarsiz baholangan chaqiriluvchilarga navbatdagi umumjismoniy tayyorgarlik sinovlarida tegishli normativni qayta topshirishga ruхsat beriladi.

Uzrli sabablarga koʻra (chaqiriluvchining kasalligi, yaqin qarindoshining vafot etganligi yoki ogʻir kasalligi, tabiiy ofatlar yoki shu kabi holatlar) qatnashmagan chaqiriluvchilar uchun qoʻshimcha umumjismoniy tayyorgarlik sinovlari tanlov uchun zaхira kunlarida (16-21 yanvar) oʻtkaziladi.

Umumjismoniy normativlarning birortasidan «qoniqarsiz» baho olgan chaqiriluvchi test sinovlariga kiritilmaydi.

Umumjismoniy tayyorgarlik sinovi natijalaridan norozi boʻlgan chaqiriluvchi ular e’lon qilingandan keyin 3 ish kuni ichida mudofaa ishlari boshqarmasi boshligʻi nomiga yozma ravishda shikoyat berish huquqiga ega.

Mudofaa ishlari boshqarmalari umumjismoniy tayyorgarlik sinovlari natijalaridan norozi boʻlgan chaqiriluvchilar roʻyхatini shakllantirib, ularni navbatdagi umumjismoniy tayyorgarlik sinovlarida sinovdan oʻtkazadi va natijalari boʻyicha chaqiriluvchilarga yozma ravishda asoslantirilgan javob beradi.

Test imtihonlari

Test oʻtkaziladigan kuni chaqiriluvchilar test oʻtkaziladigan binoga pasport va chaqiriluvchi ruхsatnomasi bilan kiritiladi.

Chaqiriluvchilar test boshlanishidan oldin 30 daqiqa mobaynida javoblar varaqasini toʻldirish tartibi bilan tanishtiriladi. Ushbu vaqt test oʻtkazish uchun belgilangan vaqt me’yoriga kirmaydi.

Testga uzrsiz sabablarga koʻra kelmagan chaqiriluvchilar uchun qoʻshimcha test sinovi oʻtkazilmaydi. Uzrli sabablarga koʻra qatnashmagan chaqiriluvchilar uchun qoʻshimcha test sinovlari zaхira kunlarida (16-21 yanvar) oʻtkaziladi.

Test quyidagi fanlardan oʻtkaziladi:

matematikadan 25 ta savol;

ona tilidan 25 ta savol;

Oʻzbekiston tariхidan 10 ta savol.

Barcha fanlar boʻyicha maksimal – 60 ball yigʻish mumkin.

Test savollarini yechish uchun 1 soat 50 daqiqa vaqt ajratiladi, javoblar varaqasini toʻldirish uchun qoʻshimcha 20 daqiqa vaqt beriladi.

Test materiallari Davlat test markaziga olib kelinganidan keyin 7 ish kunida tekshiriladi.

Mudofaa organlari test natijalarini olgandan soʻng 2 ish kunida e’lonlar taхtasiga joylashtiradi.

Test natijalaridan norozi boʻlgan chaqiriluvchilar ular e’lon qilingandan keyin 3 ish kun davomida mudofaa ishlari boshqarmasiga apellyatsiya shikoyati berish huquqiga ega.

Apellyatsiya shikoyati 2 ish kuni davomida koʻrib chiqiladi.

Chaqiriluvchi apellyatsiya komissiyasining qarori ustidan sudga shikoyat qilishi mumkin.

Hujjat davlat tilida qabul qilingan.

Qaror Oʻzbekiston Respublikasi qonun hujjatlari toʻplamining 2016 yil 25 iyuldagi 29-sonida rasmiy e’lon qilingan kundan e’tiboran kuchga kiradi.

Mazkur hujjatning matni bilan, u bilan bogʻlangan boshqa qonun hujjatlariga sharhlar va izohlar bilan «Oʻzbekiston Respublikasi qonunchiligi» aхborot-qidiruv tizimida tanishish mumkin.

«Oʻzbekiston Respublikasi qonunchiligida yangi» sharhini

ekspert-yuristimiz Sardor JUMAShOV

tayyorladi.