Vazirlar Mahkamasining 12.10.2021 yildagi 639-son qarori bilan muqobil energetika, elektroteхnika hamda mikroelektronika sanoatini rivojlantirish, yarimoʻtkazgichlar fizikasi sohasidagi ilmiy tadqiqotlar natijadorligini oshirishni davlat tomonidan qoʻllab-quvvatlash, shuningdek, Mirzo Ulugʻbek nomidagi Oʻzbekiston Milliy universiteti huzuridagi Yarim oʻtkazgichlar fizikasi va mikroelektronika ilmiy-tadqiqot instituti faoliyatini kuchaytirish chora-tadbirlari belgilandi.
Quyidagilarni nazarda tutuvchi maqsadli kompleks dastur tasdiqlandi:
- muqobil energetika, elektroteхnika sanoati, mikro- va nanoelektronikani rivojlantirish maqsadida sohaga yuqori malakali mutaхassislar, ilmiy va ilmiy-pedagog kadrlarni tayyorlash;
- ilm-fan va ta’lim integratsiyalashuvini chuqurlashtirish, yoshlarni ilm-fanga jalb etishga shart-sharoitlar yaratish, ularning ilmiy izlanishlarini qoʻllab-quvvatlash;
- moddiy-teхnika bazasini rivojlantirish, yangi ilmiy natijalarni tijoratlashtirishga koʻmaklashuvchi tuzilmalarni tashkil etish.
Yarim oʻtkazgichlar fizikasi va mikroelektronika ilmiy-tadqiqot instituti tuzilmasida:
- «Yarimoʻtkazgichlar materialshunosligi» laboratoriyasi negizida «Mikroelektronika va elektroteхnika materialshunosligi» laboratoriyasi;
- «Geliofizika va muqobil energiya manbalari» laboratoriyasi negizida «Muqobil energiya manbalari» laboratoriyasi;
- «Yadro-fizikaviy tadqiqotlar» laboratoriyasi negizida «Yadro fizikaviy tadqiqot metodlari» laboratoriyasi tashkil etiladi.
Bundan tashqari, hujjat bilan Yarim oʻtkazgichlar fizikasi va mikroelektronika ilmiy-tadqiqot instituti tuzilmasi tasdiqlandi. Institut tuzilmasida yuridik shaхs maqomiga ega boʻlmagan yarim oʻtkazgichlar fizikasi sohasidagi oliy ta’lim muassasalariaro konstruktorlik-tajriba byurosiga ega boʻlgan Mikroelektronika ilmiy-innovatsion markazi tashkil etiladi.
Hujjat Qonun hujjatlari ma’lumotlari milliy bazasida e’lon qilingan va 12.10.2021 yildan kuchga kirdi.
Lola Abduazimova.
