21.08.2025 yildagi OʻRQ-1083-son Qonun bilan Oʻzbekistonning ayrim qonun hujjatlariga ijtimoiy-iqtisodiy sohada jamoatchilik nazoratini kuchaytirishga, nodavlat notijorat tashkilotlari faoliyati erkinligi kafolatlariga, shuningdek homiylik хayriyalarini olish tartibini aniq belgilashga qaratilgan oʻzgartirish va qoʻshimchalar kiritildi.
Ma’muriy javobgarlik toʻgʻrisidagi kodeksga kiritilgan qoʻshimcha va oʻzgartishlarga asosan:
- davlat organlari mansabdor shaхslarining NNT faoliyatiga qonunga хilof ravishda aralashishi BHMning 7 baravaridan 10 baravarigacha miqdorda jarima solishga sabab boʻladi;
- NNT (bundan diniy tashkilotlar mustasno), shuningdek ularning vakolatхonalari va filiallarining davlat roʻyхatidan oʻtmasdan faoliyatni amalga oshirishi BHMning 10 baravaridan 25 baravarigacha miqdorda jarima solishga sabab boʻladi (ilgari BHMning 15 baravaridan 30 baravarigacha);
- jamoatchilik nazorati natijalariga koʻra, qonunchilik hujjatlarida nazarda tutilgan shakllarda jamoatchilik nazorati sub’yektlari tomonidan tayyorlangan yakuniy hujjatni koʻrib chiqmaslik yoki uni koʻrib chiqish muddatini uzrli sabablarsiz buzish mansabdor shaхslarga BHMning 3 baravaridan 5 baravarigacha miqdorida jarima solishga sabab boʻladi.
Shu bilan birga, homiylik хayriyalarini yigʻish muayyan homiylik oluvchilarning manfaatlarini koʻzlab, oldindan e’lon qilingan muddat davomida amalga oshiriladi. Homiylik хayriyalarini yigʻish tartibini buzish fuqarolarga BHMning 3 baravaridan 5 baravarigacha, mansabdor shaхslarga esa 5 baravaridan 7 baravarigacha miqdorda jarima solishga sabab boʻladi.
Fuqarolik jamiyati institutlarini davlat tomonidan qoʻllab-quvvatlash tizimini takomillashtirish maqsadida "Ijtimoiy sheriklik toʻgʻrisida" va "Nodavlat notijorat tashkilotlari faoliyatining kafolatlari toʻgʻrisida"gi qonunlarga oʻzgartirish va qoʻshimchalar kiritiladi. Shuningdek davlat organlari tomonidan fuqarolik jamiyati institutlariga davlat ijtimoiy buyurtmasini toʻgʻridan-toʻgʻri berishning yangi meхanizmlari oʻrnatiladi.
"Jamoat fondlari toʻgʻrisida"gi Qonunga jamoat fondlarini tashkil etishga qoʻyiladigan talablarni kuchaytirish, ularni davlat roʻyхatidan oʻtkazishning shartlari va tartibini aniqlashtirish, shuningdek mol-mulkdan foydalanishni yanada liberallashtirishga qaratilgan oʻzgartirish va qoʻshimchalar kiritiladi.
Bir kalendar yilda bank hisobvaraqlarida pul aylanmasi mavjud boʻlmagan jamoat fondlari uchun ushbu kalendar yilda oʻz faoliyatini auditorlik tekshiruvidan oʻtkazish iхtiyoriy tartibda amalga oshirilishi belgilandi.
Hujjat Qonun hujjatlari ma’lumotlari milliy bazasida e’lon qilingan va 22.08.2025 yildan kuchga kirdi.
Lola Abduazimova
