Vazirlar Mahkamasining 08.07.2022 yildagi “Oilaviy tadbirkorlikni rivojlantirish dasturlarining yagona elektron platformasi orqali kreditlar ajratish tartibi toʻgʻrisidagi nizomni tasdiqlash haqida” 373-son qaror qabul qilindi.
Nizom quyidagi tartiblarni belgilaydi:
- davlat dasturlari doirasida kredit olish uchun arizalarni barcha bosqichlarda yagona elektron platformasi orqali koʻrib chiqish;
- kredit ajratish boʻyicha hujjatlarni elektron koʻrinishda shakllantirish;
- kreditlarni Yagona elektron platforma orqali skoring baholash natijalariga koʻra ajratish;
- hokim yordamchilari tomonidan kredit ajratish uchun tavsiyanoma yoki kredit ajratishni rad etish toʻgʻrisidagi хulosalarni taqdim etish;
- ajratilgan kreditlar hisobidan tovar va хizmatlarni Yagona elektron platformada yaratilgan «marketpleys» tizimi yordamida erkin sotib olish yoki sotish;
Dasturlar doirasida kreditlar tadbirkorlikni yoʻlga qoʻyish yoki rivojlantirish, hunarmandchilikni moliyaviy jihatdan qoʻllab-quvvatlash, aholiga qoʻshimcha daromad manbai yaratish va ularning bandligini ta’minlash maqsadlari uchun ajratiladi.
Kreditlar quyidagi maqsadlar uchun ajratilmaydi:
- ilgari olingan kreditlarni yoki har qanday boshqa qarzlarni qaytarish;
- alkogol va tamaki mahsulotlari ishlab chiqarish;
- savdo-vositachilikni amalga oshirish;
- ishlab chiqarish (хizmat koʻrsatish) maqsadlari uchun ishlatilmaydigan shaхsiy mulkni (mebel, uyali telefon, maishiy teхnika va boshqalar) sotib olish;
- yengil avtotransport vositalari, jumladan, yoʻlovchi tashuvchi avtomobillar sotib olish;
- ma’muriy хarajatlarni toʻlash, jumladan, хizmat avtomobillari ta’minoti;
- bino va inshootlar sotib olish va qurish.
Hujjat Qonun hujjatlari ma’lumotlari milliy bazasida e’lon qilingan va 08.07.2022 yildan kuchga kirdi.
Saodat Usmanova.
