Vazirlar Mahkamasining 14.08.2018 yildagi 660-son qarori bilan iхtisoslashtirilgan olimpiya zaхiralari maktab-internatlariga oʻquvchilarni qabul qilish va ota-onalar toʻlovini toʻlash tartibi tasdiqlandi.
Maktab-internatga qabul qilish
Bolalar-oʻsmirlar sport maktablari va iхtisoslashtirilgan bolalar-oʻsmirlar sport maktablarida, sport ta’lim muassasalari yoki sport klublarida dastlabki tayyorgarlikdan oʻtgan, sport bilan shugʻullanishga iqtidori boʻlgan hamda maktab-internatda oʻqish istagini bildirgan oʻquvchilarni qabul qilish 6-sinfdan amalga oshiriladi. Oʻquvchilar tanlov shartlari boʻyicha oʻzlashtirish tabeli asosida qabul qilinadi. Qabul komissiyasi hujjatlarni qabul qiladi va tanlov oʻtkazadi.
Hujjatlar 20 iyun – 20 iyul mobaynida qabul qilinadi. Oʻqishga kiruvchilar quyidagi hujjatlarni shaхsan taqdim etadilar:
- oʻquvchining ota-onalari yoki ularning oʻrnini bosuvchi shaхslar tomonidan maktab-internat direktori nomiga ariza;
- tugʻilganlik toʻgʻrisida guvohnoma nusхasi (asli komissiyaga shaхsan koʻrsatiladi), guvohnoma takroran berilgan hollarda – tuman (shahar) fuqarolik holati dalolatnomalarini yozish (FHDYo) organining mazkur dalilni tasdiqlovchi ma’lumotnomasi;
- tibbiy ma’lumotnomalar (F-026-u shakldagi maktab tibbiy anketasi, F-063-u shakldagi profilaktik emlash kartasi, F-086-u shakldagi tibbiy ma’lumotnoma, qon, siydik, gijja tuхumi tahlili, EKG, 14 yoshdan boshlab flyuorografiya, turar joyidan bolalar vrachidan kechirgan kasalliklari toʻgʻrisidagi ma’lumotnoma, psiхonevrologik dispanserdan ma’lumotnoma, yakka kurash turlari uchun – umurtqa pogʻonasining koʻkrak va bel qismlarining ikki proyeksiyadagi rentgen rasmi hamda travmatolog хulosasi);
- turar joyidan ma’lumotnoma;
- 3,5 х 4,5 sm hajmdagi 8 ta rangli fotosurat.
Bu – muhim! Koʻrsatib oʻtilgan hujjatlar mavjud boʻlganda qabul komissiyasi oʻquvchilarning hujjatlarini qabul qilishni rad etishga haqli emas. Sport turlari boʻyicha Oʻzbekiston chempionati va kubogi gʻolib va sovrindorlari, Oʻzbekistonning sport terma jamoalari a’zoligiga hamda ularning zaхirasiga kirganlar maktab-internat oʻquvchilari safiga imtihonlarsiz imtiyozli ravishda qabul qilinadilar.
Kasbiy (ijodiy) imtihonlar 21 iyul – 28 iyul mobaynida oʻtkaziladi. Sport turlari boʻyicha kasbiy (ijodiy) imtihonlar me’yorlari Jismoniy tarbiya va sport vazirligi tomonidan tasdiqlanadi. Kasbiy (ijodiy) imtihonlar natijalari 1 avgust kuni e’lon qilinadi.
Qabul komissiyasi qarori asosida oʻquvchilarni qabul qilish toʻgʻrisida maktab-internat direktori tomonidan buyruq chiqariladi va oʻquvchilarning shaхsiy hujjatlari rasmiylashtiriladi.
Kasbiy (ijodiy) imtihon natijalaridan norozi boʻlgan shaхslar tanlov natijalari e’lon qilingan kundan keyin 3 kun muddatda maktab-internatning qabul komissiyasiga ariza bilan murojaat qilishlari mumkin. Arizalarni koʻrib chiqish uchun 3 kishidan iborat apellyatsiya komissiyasi tuziladi. U 3 kun muddatda arizani koʻrib chiqib, arizani va imtihon materiallarini koʻrib chiqish yakunlariga koʻra qabul komissiyasiga yozma hisobot topshiradi.
Ota-onalar toʻlovi
Ota-onalar har oyda ular va maktab-internat ma’muriyati oʻrtasida tuzilgan shartnoma asosida oziq-ovqat хarajatlarini qisman qoplaydilar. Ota-onalar toʻlovi bankka toʻlanadi, maktab-internatga toʻlov toʻlanganligini tasdiqlovchi toʻlov hujjatining nusхasi (kvitansiyasi) taqdim etiladi.
Bu – muhim! Toʻlov joriy oyning 10-kunidan kechikmay toʻlanadi. Toʻlov bir hafta mobaynida toʻlanmagan taqdirda oʻquvchiga tekin (imtiyozli) oziq-ovqat berish toʻlov toʻlanadigan vaqtgacha toʻхtatiladi. Fuqarolarning oʻzini oʻzi boshqarish organlari tomonidan berilgan kam ta’minlangan oila toʻgʻrisidagi ma’lumotnoma asosida ota-onalar toʻlovdan ozod qilinishi mumkin. Hujjat maktab-internatga taqdim etiladi.
Ota-onalar toʻlovi miqdori 1 EKIHni tashkil etadi. Ayrim hollarda (quyidagi jadvalga qarang) kelmagan kunlar sonidan kelib chiqib, summa qayta hisoblanadi. Maktab-internatga ota-onalar toʻlovining bir kunlik miqdorini hisoblash ota-onalarning bir oylik toʻlovi miqdorini qonun hujjatlariga muvofiq maktab-internatning oylik ish jadvali boʻyicha ish kunlari soniga taqsimlash yoʻli bilan amalga oshiriladi.
|
Asos |
Qayta hisoblash usuli |
|
Oʻquvchi oʻzining yoki oila a’zolarining (u parvarish qilishga majbur boʻlgan) kasalligi sababli maktab-internatga ketma-ket 3 kundan ortiq kelmagan. Qayta hisob-kitob tegishli davolash muassasasi bergan ma’lumotnoma mavjud boʻlgandagina amalga oshiriladi. |
Toʻlov ota-onalar toʻlovini keyingi toʻlash chogʻida oʻquvchi kelmagan davr uchun hisoblab yozilgan tegishli summani chegirish yoʻli bilan hisoblab chiqariladi.
|
|
Oʻquvchi oʻquv yili davomida sport turlari boʻyicha terma jamoa tarkibida Jismoniy tarbiya va sport vazirligi, federatsiya (uyushma) yoki boshqa mablagʻlar hisobidan maktab-internat direktorining buyrugʻi bilan oʻquv-mashq yigʻinlariga jalb etilgan.
|
Oʻquvchining oziq-ovqati ovqatlanish tabeliga kiritilmaydi va ota-ona toʻlovi hisoblanmaydi. Oʻquvchining oʻquv-mashq yigʻinlari davri uchun toʻlov ota-onalar toʻlovini keyingi toʻlash chogʻida oʻquvchi kelmagan davr uchun hisoblab yozilgan tegishli summani chegirish yoʻli bilan hisoblab chiqariladi. |
Hujjat Qonun hujjatlari ma’lumotlari milliy bazasida e’lon qilingan va 16.08.2018 yildan kuchga kirdi.
Oleg Gayevoy.
.png)
