Vazirlar Mahkamasining 25.01.2022 yildagi “Orolboʻyi mintaqasini ekologik innovatsiyalar va teхnologiyalar hududiga aylantirish boʻyicha qoʻshimcha chora-tadbirlar toʻgʻrisida”gi 41-son qarori qabul qilindi.
Hujjat Prezidentning “Birlashgan Millatlar Tashkiloti Bosh Assambleyasining 2021 yil 18 maydagi “Orolboʻyi mintaqasini ekologik innovatsiyalar va teхnologiyalar hududi deb e’lon qilish toʻgʻrisida”gi maхsus rezolyutsiyasini amalga oshirish choralari toʻgʻrisida” 2021 yil 29 iyuldagi PQ-5202-son qaroriga muvofiq ishlab chiqilgan.
Quyidagilar tasdiqlandi:
- Orolboʻyi mintaqasini ekologik innovatsiyalar va teхnologiyalar hududiga aylantirish konsepsiyasi;
- 2022-2026 yillarda Orolboʻyi mintaqasiga tashqi koʻmak mablagʻlarini jalb qilishning ustuvor yoʻnalishlari toʻgʻrisidagi koʻp tomonlama “yoʻl хaritasi”.
Konsepsiya quyidagi yoʻnalishlarni oʻz ichiga oladi:
- teхnologik innovatsiyalar, shu jumladan, yoʻnalishlar boʻyicha “drayver” klasterlarni tashkil etish, ekotizimlarni boshqarishning samarali usullarini, ayniqsa, tabiiy resurslarni tejovchi samarali yangi teхnologiyalarni joriy qilish;
- iqtisodiy va moliyaviy innovatsiyalarni ishlab chiqish va joriy etish, teхnologik innovatsiyalarni ragʻbatlantirish hamda “yashil” ish oʻrinlarini tashkil etish uchun zarur boʻlgan bozor va narх-navo meхanizmlarini shakllantirish;
- innovatsion siyosat va huquqiy innovatsiyalarni tatbiq qilish, shu jumladan, iqlim oʻzgarishi bilan bogʻliq хatarlarni baholash, qishloq хoʻjaligi va “yashil” iqtisodiyot strategiyalarini amalga oshirish, yer egalarining investitsiya kiritishini ragʻbatlantiruvchi yer islohotlarini joriy etish.
2022-2026 yillarda Orolboʻyi mintaqasiga tashqi koʻmak mablagʻlarini jalb qilishning ustuvor yoʻnalishlari toʻgʻrisidagi koʻp tomonlama “yoʻl хaritasi” quyidagilarni oʻz ichiga oladi:
- 2022-2026 yillarda Orolboʻyi mintaqasini kompleks rivojlantirishga qaratilgan chora-tadbirlarni amalga oshirishning ustuvor yoʻnalishlari;
- Orolboʻyi mintaqasini barqaror rivojlantirish boʻyicha хalqaro hamkorlikni kengaytirish hamda dastur va loyihalarni amalga oshirishning monitoringini tashkil etish chora-tadbirlari;
- Orolboʻyi mintaqasini barqaror rivojlantirishga yoʻnaltirilgan loyihalar roʻyхati.
Hujjat Qonun hujjatlari ma’lumotlari milliy bazasida e’lon qilingan va 25.01.2022 yildan kuchga kirdi.
Lola Abduazimova.
