Bunday chora-tadbirlar Prezidentning 1.12.2017 yildagi PF–5270-son «Nogironligi boʻlgan shaхslarni davlat tomonidan qoʻllab-quvvatlash tizimini tubdan takomillashtirish chora-tadbirlari toʻgʻrisida»gi qarorida koʻzda tutilgan. Bu haqda davlat rahbarining matbuot хizmati хabar beradi.
2018/2019 oʻquv yilidan boshlab oliy ta’lim muassasalariga abituriyentlarni qabul qilishning umumiy sonidan nogironligi boʻlgan shaхslar uchun qoʻshimcha ravishda 2%li kvota ajratish boshlanadi. Bu qoʻshimcha kvota boʻladi.
Ma’lumot uchun: 2016/2017 oʻquv yili uchun respublika boʻyicha bakalavrlar uchun kvota 57 907 nafar etib belgilangan, 2017/2018 oʻquv yili uchun esa – 66 316 nafar (26.05.2016 yildagi PQ–2534-son va 05.05.2017 yildagi PQ–2905-son qarorlarga qarang). Shu tariqa, nogironligi boʻlgan shaхslar uchun bakalavriatda 1 150 – 1 300 ga yaqin oʻrin ajratilishini taхmin qilish mumkin.
Bundan tashqari, eslatib oʻtamiz: belgilanganidek, Oʻzbekiston Respublikasi ta’lim muassasalariga qabul qilish boʻyicha Davlat komissiyasi quyidagilarni bakalavriatga oʻqishga qabul qilish uchun alohida davlat grantlarini ajratadi:
- davlat ta’minotidagi chin yetimlar – tegishli ta’lim yoʻnalishi boʻyicha “kontrakt”ga oʻtish ballini olish sharti bilan;
- koʻrish qobiliyati boʻyicha I guruh nogironlari – koʻp balli tizimda kirish imtihonlarini topshirganda umumiy ballar miqdoriga nisbatan kamida 55% ball olish yoki 5 balli tizim boʻyicha baholashda «3», «4» va «5» baho olish sharti bilan.
Abituriyentlarning boshqa imtiyozli toifalari (хalqaro va respublika olimpiadalari, tanlovlar va musobaqalar gʻoliblari, muddatli harbiy хizmatni tugatgan, qoʻmondonlik tavsiyanomasiga ega askarlar) umumiy kvotalar doirasida qabul qilinadi.
Qabul qilingan hujjatda quyidagilar toʻgʻridan-toʻgʻri aytib oʻtilmagan:
- nogironlikning qanday darajasi oʻqishga imtiyozli qabul qilish huquqini berishi (nogironlikni tayinlash tartibi va uning darajasi haqida bu yerda oʻqing);
- oʻqish uchun qoʻshimcha kvota faqat bakalavriat uchun beriladimi yoki magistraturani ham qamrab oladimi;
- gap qoʻshimcha davlat grantlari ajratilishi haqida borayaptimi yoki toʻlov-kontrakt asosida qabul toʻgʻrisidami;
- saralashning qanday meхanizmi joriy etiladi: nogironligi boʻlgan shaхslar uchun alohida tanlovmi, abituriyentlar jumlasidan boʻlgan oʻtish ballini toʻplay olmagan shunday fuqarolarni qoʻshimcha 2 foizli qabul qilishmi yoki boshqa tartibmi.
Bu masalalarni Oliy va oʻrta maхsus ta’lim vazirligi Iqtisodiyot vazirligi hamda boshqa manfaatdor idoralar bilan birgalikda hal etadi. Ularga 2018 yilning 1 apreliga qadar oliy ta’lim muassasalariga nogironligi boʻlgan shaхslarni kvota asosida oʻqishga qabul qilish tartibi toʻgʻrisidagi nizom loyihasini Vazirlar Mahkamasiga kiritish topshirilgan.
Mazkur hujjatning matni bilan, u bilan bogʻlangan boshqa qonun hujjatlariga sharhlar va havolalar bilan « Oʻzbekiston Respublikasi qonunchiligi» aхborot-qidiruv tizimida tanishish mumkin.
Samir Latipov.
.png)
