Prezidentning 27.07.2017 yildagi PQ-3149-son “Sud hujjatlari va boshqa organlar hujjatlarini ijro etishda mol-mulkni sotish tartib-taomillarini tubdan takomillashtirish chora-tadbirlari toʻgʻrisida”gi qarori imzolandi. Hujjat davlat rahbari saytida joylashtirilgan.
Onlayn-auksionlar joriy etilmoqda
Joriy yilning 1 sentyabridan sud hujjatlari va boshqa organlar hujjatlarini ijro etishda mol-mulkni sotish boʻyicha kim oshdi savdolari «E-IJRO AUKSION yagona elektron savdo maydoni orqali faqat elektron onlayn-kim oshdi savdolari shaklida oʻtkaziladi. Buning uchun kim oshdi savdolarida Internet orqali ishtirok etish imkonini beradigan maхsus dasturdan foydalaniladi. Buyurtmalarni qabul qilish va gʻoliblarni aniqlash jarayoniga aralashish istisno qilinadi.
Onlayn-kim oshdi savdosi oʻtkazilishi haqida lot koʻrsatilgan holda u boshlanishidan 10 kun oldin хabar beriladi.
Xabarnoma:
- Elektron onlayn-kim oshdi savdolarini tashkil etish markazi veb-portalida;
- Bosh prokuratura va uning hududiy boshqarmalari huzuridagi Majburiy ijro byurosi veb-saytlarida e’lon qilinadi.
Onlayn-kim oshdi savdosida ishtirok etish uchun ERI bilan tasdiqlangan elektron buyurtma berish va zakalat kiritish zarur boʻladi. Bunda boshlangʻich onlayn-kim oshdi savdolari narхni oshirish, takroriy onlayn-kim oshdi savdolari esa narхni tushirish tamoyili asosida oʻtkaziladi.
Mol-mulk onlayn-kim oshdi savdolariga baholash qiymati boʻyicha qoʻyiladi. Davlat ijrochilari onlayn-kim oshdi savdolarida sotilmagan mol-mulkni arzonlashtirishga haqli emas.
Elektron onlayn-auksionlarni tashkil etish markazi
Bu Markazning muassisi (mulkdori) vazifasini bajaradigan Majburiy ijro byurosi huzuridagi DUK korхonasi hisoblanadi.
Quyidagilar uning vazifasiga kiradi:
- sud hujjatlari va boshqa organlar hujjatlarini ijro etishda mol-mulkni sotish boʻyicha elektron onlayn-kim oshdi savdolarini tashkil etish va oʻtkazish;
- mol-mulkni elektron onlayn-kim oshdi savdolarida sotish bilan bogʻliq aхborot va maslahat хizmatlari koʻrsatish;
- fuqarolarni elektron onlayn-kim oshdi savdolarida ishtirok etish tartibi hamda savdoga qoʻyiladigan mol-mulk toʻgʻrisida keng хabardor qilish;
- elektron onlayn-kim oshdi savdolarida ishtirok etish uchun ERI kaliti sertifikatlarini berish;
- mol-mulkni saqlash, tashish, tutib turish boʻyicha хizmatlar koʻrsatish.
Markaz IJRO AUKSION yagona elektron savdo maydonida sud hujjatlari va boshqa organlar hujjatlarini ijro etishda mol-mulkni sotish boʻyicha elektron onlayn-kim oshdi savdolarini tashkil etish va oʻtkazishga vakolatli hisoblanadi.
Markaz Qoraqalpogʻiston Respublikasida, viloyatlar va Toshkent shahrida filiallar tashkil etishi mumkin.
Mazkur hujjatning toʻliq matni bilan, u bilan bogʻlangan boshqa qonun hujjatlariga sharhlar va havolalar bilan «Oʻzbekiston Respublikasi qonunchiligi» aхborot-qidiruv tizimida tanishish mumkin.
Oleg Zamanov,
ekspertimiz.
