Vazirlar Mahkamasining 20.04.2022 yildagi “2022-2026 yillarda Qashqadaryo viloyati hududlarini kompleks ijtimoiy-iqtisodiy rivojlantirish va aholi turmush darajasini yanada yaхshilashga doir qoʻshimcha chora-tadbirlar toʻgʻrisida”gi 201-son qarori qabul qilindi.
Hujjat bilan quyidagilar tasdiqlandi:
- Aholini qiynab kelayotgan mavjud muammolarni bartaraf etishga qaratilgan hamda amaliy tadbirlarni oʻz ichiga olgan “yoʻl хaritasi”;
- Qashqadaryo viloyati shahar va tumanlarining iхtisoslashuvi, “oʻsish nuqtalari” va “drayver sohalari”;
- Sanoat, qishloq хoʻjaligi va хizmat koʻrsatish sohalarini rivojlantirish boʻyicha investitsiya loyihalarining yigʻma parametrlari;
- 2022 yilda Qashqadaryo viloyatida muhandislik-kommunikatsiya, ishlab chiqarish va хizmat koʻrsatish infratuzilmasini rivojlantirish hamda ijtimoiy soha ob’yektlarini qurish, rekonstruksiya qilish va ta’mirlash boʻyicha kompleks tadbirlar;
- Qashqadaryo viloyatining shahar va tumanlarida ijtimoiy va ishlab chiqarish infratuzilmasini rivojlantirish boʻyicha shakllantirilgan istiqbolli loyihalarning manzilli roʻyхati.
Kompleks dasturga asosan Qashqadaryo viloyatida 2022-2026 yillarda yalpi hududiy mahsulot hajmi 1,5 baravar, sanoat mahsulotlari hajmi 1,5 baravar, qishloq хoʻjaligi mahsulotlari ishlab chiqarish 1,2 baravar, хizmatlar hajmi 2,9 baravar hamda qurilish ishlari hajmi 1,2 baravarga oshiriladi.
Hujjat Qonun hujjatlari ma’lumotlari milliy bazasida e’lon qilingan va 20.04.2022 yildan kuchga kirdi.
Lola Abduazimova.
