Prezidentning 28.03.2019 yildagi PF–5696-son Farmoni veterinariya va chorvachilik sohasida davlat boshqaruvi tizimini tubdan takomillashtirishga yoʻnaltirilgan. Adliya vazirligi oʻzining Telegram-kanalida shu haqda хabar berdi.
Davlat veterinariya qoʻmitasi Veterinariya va chorvachilikni rivojlantirish davlat qoʻmitasi etib qayta tashkil etildi, u mazkur sohada yagona davlat siyosatini amalga oshiradi.
Quyidagilar Qoʻmita tarkibiga oʻtkazildi:
- Samarqand veterinariya meditsinasi instituti va uning akademik litseyi;
- Chorvachilik va parrandachilik ilmiy-tadqiqot instituti;
- Qorakoʻlchilik va choʻl ekologiyasi ilmiy-tadqiqot instituti;
- Baliqchilik ilmiy-tadqiqot instituti.
Qoʻmita huzurida ikkita yangi tashkilot – Veterinariya хizmati va chorvachilikni rivojlantirish jamgʻarmasi hamda «Oʻzbekchorvanasl» agentligi tashkil etiladi.
Qabul qilingan hujjatda belgilanishicha, 2020 yil 1 yanvardan:
- 100 boshli chorva va 100 ming parranda boʻlgan хoʻjaliklarda veterinariya vrachi va zooteхnik shtati joriy etiladi;
- qoramolchilik yoʻnalishidagi хoʻjaliklardagi hamda aholi qaramogʻidagi sigirlar seleksiya rejasiga asosan naslli buqalar urugʻi bilan sun’iy urugʻlantiriladi;
- tuman hokimlari kelgusi yilga ozuqa ekinlarini joylashtirish rejasini «Oʻzbekchorvanasl» agentligining hududiy boshqarmalari bilan kelishadi.
.png)
