Soliq solishning soddalashtirilgan tartibiga oʻtish osonlashdi

SKning 351-moddasi ikkinchi qismi yangi tahrirda qabul qilindi. Endi hisobot yili yakunlariga koʻra kichik biznes sub’yektlari uchun oʻrnatilgan  mezonlarga muvofiq keladigan umumbelgilangan soliqlar toʻlovchilari YaST toʻlashga oʻtiladigan chorakning birinchi oyi 10-sanasidan kechiktirmay DSIga tegishli bildirishni yuborgan holda YaST toʻlashga oʻtishlari mumkin.

Bunda ular soliq solishning soddalashtirilgan tartibiga joriy yilning oʻzlari istagan choragida (oʻzlari hal etishadi) oʻtishlari mumkin. Masalan, yil boshidan YaST toʻlashga oʻtish uchun bildirishni 10 yanvargacha yuborish lozim, agar 2-chorakdan oʻtiladigan boʻlsa, 10 apreldan kechiktirmay (va h.k.) topshirish kerak.

Eslatib oʻtamiz, avvalgi tahrirda umumbelgilangan soliqlardan YaST toʻlashga oʻtish uchun soliq organlarini keyingi hisobot davri (chorak) boshlanishidan bir oy oldin kechiktirmay yozma ravishda хabardor etish lozim edi.

Mazkur hujjatning toʻliq matni bilan, u bilan bogʻlangan boshqa qonun hujjatlariga sharhlar va havolalar bilan yaqin kunlarda «Oʻzbekiston Respublikasi qonunchiligi» aхborot-qidiruv tizimida tanishish mumkin.  

Muzaffar Mirzaganiyev,
ekspertimiz