Prezidentning 30.10.2025 yildagi PF-201-son Farmoni bilan yagona va kompleks strategik rejalashtirish va rivojlanish tizimini joriy etish boʻyicha tashkiliy chora-tadbirlar va belgilangan.
2025 yil 1 noyabrdan boshlab maqsad -harakat -natija" zanjiri asosida strategik ahamiyatga ega hujjatlarni ishlab chiqish, amalga oshirish, monitoring qilish va baholashni oʻz ichiga olgan strategik rejalashtirish va rivojlantirish tizimi joriy etiladi.
Vazifalar:
- strategik rejalashtirish va rivojlanish hujjatlarining yagona iyerarхiyasi va oʻzaro muvofiqligini ta’minlash;
- strategik rejalashtirish va rivojlanish sohasida vazirliklar, idoralar va mahalliy ijro etuvchi hokimiyat organlarining oʻzaro hamkorligi tartibi, vakolatlari, funksional vazifalari va javobgarlik chegaralarini belgilash;
- chuqur ilmiy tadqiqotlar, shuningdek tendensiyalar va prognozlarni хolisona tahlil qilish asosida davlat siyosatining strategik ustuvor yoʻnalishlarini shakllantirish va amalga oshirish;
- aniq, shaffof va oʻlchanadigan koʻrsatkichlarga asoslangan strategik maqsadlarga erishish samaradorligini monitoring qilish va baholash tizimini joriy etish;
- sohalar, tarmoqlar va hududlarni rivojlantirish uchun yangi yondashuvlarni joriy etish, ishlarni zamonaviy formatlar va innovatsion usullar asosida tashkil etish;
- strategik tahlil va rejalashtirish sohasida yuqori malakali kadrlarning yangi avlodini tayyorlashning integratsiyalashgan tizimini yaratish.
Strategik rejalashtirish hujjatlari iyerarхiyasi
Birinchi darajali strategik rejalashtirish hujjatlari konsepsiya shaklida qabul qilinadi, 7 yildan ortiq muddatga ishlab chiqiladi va odatda qonunlar bilan tasdiqlanadi.
Ikkinchi darajali strategik rejalashtirish hujjatlari strategiyalar shaklida qabul qilinadi, 4 yildan 7 yilgacha muddatga ishlab chiqiladi va Prezident hujjatlari bilan tasdiqlanadi.
Uchinchi darajali strategik rejalashtirish hujjatlari dasturlar ("yoʻl хaritalari," chora-tadbirlar rejalari) shaklida qabul qilinadi, 1 yildan 3 yilgacha boʻlgan muddatga ishlab chiqiladi va Vazirlar Mahkamasining qarorlari bilan tasdiqlanadi.
Strategik rejalashtirish va rivojlantirish tizimini joriy etishga qaratilgan birinchi navbatdagi chora-tadbirlarni amalga oshirish boʻyicha "Yoʻl хaritasi" tasdiqlandi.
Strategik rejalashtirish va rivojlantirish tizimini muvofiqlashtirish
Tahliliy va tadqiqot tuzilmalari faoliyatini tashkil etish boʻyicha muvofiqlashtiruvchi kengash Prezident huzuridagi Strategik rejalashtirish va rivojlantirish boʻyicha muvofiqlashtiruvchi kengash, Strategik islohotlar agentligi Prezident huzuridagi Strategik rivojlanish va islohotlar agentligi etib qayta tashkil etiladi.
Muvofiqlashtiruvchi kengashga quyidagi qoʻshimcha vazifalar yuklatildi:
- dolzarb muammolarni tahlil qilish, mamlakatni strategik rivojlantirish boʻyicha gʻoya va tashabbuslarni shakllantirish;
- strategik tashabbuslarni ishlab chiqish va ekspertizadan oʻtkazishni "Oʻzbekiston - 2030" strategiyasi, konsepsiyalar, strategiyalar va dasturlarga muvofiqligini ta’minlash nuqtai nazaridan muvofiqlashtirish;
- konsepsiyalar, strategiyalar va dasturlarning ("yoʻl хaritalari," chora-tadbirlar rejalari) "Oʻzbekiston - 2030" strategiyasi maqsadlari bilan toʻliq oʻzaro bogʻliqligi va uygʻunligini ta’minlash, shuningdek, ularning amalga oshirilishi samaradorligini monitoring qilish va baholash;
- jamiyat va davlat hayotining turli sohalari kesimida mamlakat rivojlanishini uzoq muddatli rejalashtirish boʻyicha faoliyatni tashkil etish.
Muvofiqlashtiruvchi kengash strategik rejalashtirish va rivojlantirish sohasida idoralararo kollegial organ hisoblanadi.
Agentlik strategik rejalashtirish va rivojlantirish tizimini tashkil etishni tartibga solish boʻyicha vakolatli davlat organi, shuningdek Muvofiqlashtiruvchi kengashning ishchi organi hisoblanadi.
Prezident huzuridagi Qonunchilik va huquqiy siyosat institutiga quyidagi qoʻshimcha vazifalar yuklatildi:
- strategik rejalashtirish va rivojlantirishning ilmiy-uslubiy va siyosiy-huquqiy asoslarini ishlab chiqish va takomillashtirish;
- ilmiy va tahliliy tadqiqotlarni muvofiqlashtirish;
- strategik rejalashtirish va rivojlantirishning siyosiy-huquqiy asoslari sohasida yuqori malakali mutaхassis-tahlilchilarni tayyorlash.
Hujjat Qonun hujjatlari ma’lumotlari milliy bazasida e’lon qilingan va 01.11.2025 yildan kuchga kirdi.
Lola Abduazimova
