Tashkilotlar haydovchilarining (yuk avtomobillari haydovchilaridan tashqari) mehnatga haq toʻlash boʻyicha Mehnatga haq toʻlash yagona tarif setkasi boʻyicha razryadlarga tuzatishlar kiritildi (roʻyхat raqami 3130-1, 26.08.2019 y.).
Qabul qilingan hujjat bilan tashkilotlar haydovchilari mehnatiga haq toʻlashda qoʻllaniladigan umumiy razryadlarga nisbatan tibbiy хizmat haydovchilariga 1, tez tibbiy yordam haydovchilariga esa 2 razryad yuqori belgilandi. Tegishincha, ular mehnatiga haq toʻlash miqdori oshadi.
Eslatib oʻtamiz, yengil avtomobil yoki avtobus boshqaradigan tashkilotlar haydovchilari uchun razryadlar yengil avtomobil dvigatelining hajmi yoki avtobusning gabarit uzunligidan kelib chiqib belgilanadi. Haydovchilar mehnatiga haq toʻlash Mehnatga haq toʻlashning yagona tarif setkasiga (YaTS) asosan haydovchining tarif stavkasiga 1,228 miqdorida tarmoq koeffitsiyenti qoʻllanilgan holda amalga oshiriladi. YaTSning tegishli razryadi boʻyicha haydovchining bazaviy tarif stavkasini hosil qiladi.
Hujjat Qonun hujjatlari ma’lumotlari milliy bazasida e’lon qilingan va 26.08.2019 yildan kuchga kirdi.
Lenara Xikmatova.
