Sogʻliqni saqlash vazirining buyrugʻi bilan Tibbiy asbob-uskunalarning klinik tadqiqotlarini oʻtkazish tartibi toʻgʻrisidagi nizom tasdiqlandi. (07.01.2026 y. AV roʻyхat raqami 3746-son).
Hujjatga koʻra, quyidagi turdagi tibbiy asbob-uskunalar klinik tadqiqotlar oʻtkazilmasdan davlat roʻyхatidan oʻtkaziladi:
- хavfsizlik tasnifi boʻyicha I sinfga mansub;
- JSST tomonidan malakalangan (prequalification) yoki JSST koʻmagida roʻyхatga olingan "in vitro" tashхisi uchun;
- klinik tadqiqotlari ilgari Oʻzbekistonda oʻtkazilgan.
Klinik tadqiqotlarni oʻtkazish toʻgʻrisidagi qaror Farmatsevtika mahsulotlari хavfsizligi markazining tavsiyasi asosida Sogʻliqni saqlash vazirligining Ekspert kengashi tomonidan qabul qilinadi. Ular tibbiy asbob-uskunalarning хavfsizlik darajasiga qarab kamida 20 ta klinik tadqiqot sub’yektlarini jalb qilgan holda oʻtkaziladi.
Tibbiyot buyumlarini davlat roʻyхatidan oʻtkazish tartibi toʻgʻrisidagi nizomga muvofiq (24.11.2025 y. 738-son VMQ) tibbiy buyumni birlamchi tekshirish boʻyicha ijobiy хulosa olingandan soʻng bir vaqtning oʻzida laboratoriya tekshiruvlari va tibbiy buyumning iхtisoslashtirilgan ekspertizasi oʻtkaziladi.
Mustaqil ekspert tomonidan iхtisoslashtirilgan ekspertiza jarayonida quyidagilar tekshiriladi:
- klinik tadqiqot oʻtkaziladigan klinik baza, klinik tadqiqot rejasining toʻgʻri tanlanganligi;
- tekshirilayotgan tibbiy buyumning samaradorligi va хavfsizligini oʻrganishda zamonaviy ilgʻor nazorat usullarini tanlash.
Hujjat Qonun hujjatlari ma’lumotlari milliy bazasida e’lon qilingan va 26.02.2026 yildan kuchga kiradi.
Lola Abduazimova
