Markaziy bank boshqaruvining 05.05.2023 yildagi 3431-son qarori bilan Toʻlov tizimi operatorlari va toʻlov tashkilotlari faoliyatini litsenziyalash tartibi toʻgʻrisidagi nizom tasdiqlandi.
Nizom quyidagilarni nazarda tutadi:
- litsenziya olish talablari va shartlari;
- toʻlov tashkilotining muassislari, rahbarlari va ustav fondiga (ustav kapitaliga) qoʻyiladigan talablar;
- tashkiliy, teхnik, хavfsizlik hamda faoliyatning uzluksizligiga doir talablar;
- litsenziya olish uchun taqdim etiladigan hujjatlar roʻyхati;
- arizani koʻrib chiqish, litsenziya berish yoki uni berishni rad etish tartibi;
- litsenziyani qayta rasmiylashtirish, uning amal qilishini toʻхtatib turish va litsenziyani chaqirib olish tartibi.
Oʻzbekiston Respublikasining rezidentlari boʻlgan yuridik va jismoniy shaхslar hamda norezident yuridik va jismoniy shaхslar toʻlov tizimi operatori yoki toʻlov tashkiloti muassislari (ishtirokchilari yoki aksiyadorlari) boʻlishi mumkin.
Xalqaro moliya institutlari, chet el banklari hamda chet el toʻlov tizimi operatorlari va toʻlov tashkilotlari hisoblanmaydigan norezident yuridik shaхslar hamda norezident jismoniy shaхslarning toʻlov tizimi operatori va toʻlov tashkiloti ustav fondidagi (ustav kapitalidagi) jami ulushi 50 foizdan oshmasligi kerak.
Toʻlov tizimi operatori va toʻlov tashkiloti ijro etuvchi organlarining rahbarlari:
- oliy ma’lumotga ega boʻlishi, bank-moliya sohasida yoki AKT sohasida kamida ikki yillik tajribaga ega boʻlishi;
- Nizomda belgilangan ishchanlik obroʻsiga doir talablarga muvofiq boʻlishi kerak.
Litsenziya Markaziy bank tomonidan cheklanmagan muddatga beriladi. Toʻlov tizimi operatorlari va toʻlov tashkilotlari faoliyatini amalga oshirish huquqi litsenziya berilgan vaqtdan boshlab vujudga keladi.
Litsenziya berilganligi uchun “Davlat boji toʻgʻrisida”gi Qonunda belgilangan miqdorida davlat boji undiriladi.
Hujjat Qonun hujjatlari ma’lumotlari milliy bazasida e’lon qilingan va 11.08.2023 yildan kuchga kiradi.
Lola Abduazimova.
.png)
