Prezidentning 02.09.2023 yildagi «Toʻqimachilik sanoatini moliyaviy qoʻllab-quvvatlash boʻyicha qoʻshimcha chora-tadbirlar toʻgʻrisida»gi PF-155-son Farmoni qabul qilindi.
Gazlama, trikotaj mato va tayyor tikuv-trikotaj mahsulotlarini eksport qiluvchi korхonalarni aylanma mablagʻlar bilan ta’minlash uchun Eksportni qoʻllab-quvvatlash jamgʻarmasiga qoʻshimcha 50 mln AQSh dollari ajratiladi. Mablagʻlar Tiklanish va taraqqiyot jamgʻarmasi tomonidan revolver kreditlash asosida 2026 yil 1 yanvarga qadar qaytarish sharti bilan yillik 4 foiz stavkada taqdim etiladi. Chora toʻqimachilik sanoati korхonalaridagi mavjud imkoniyatlarni toʻliq safarbar etish va ularning eksport salohiyatini yanada oshirishga qaratilgan.
Prezidentning 2023 yil 10 yanvardagi «Paхta-toʻqimachilik klasterlari faoliyatini qoʻllab-quvvatlash, toʻqimachilik va tikuv-trikotaj sanoatini tubdan isloh qilish hamda sohaning eksport salohiyatini yanada oshirish chora-tadbirlari toʻgʻrisida»gi PF-2-son Farmoniga tegishli oʻzgartirishlar kiritiladi.
Hujjat Qonun hujjatlari ma’lumotlari milliy bazasida e’lon qilingan va 04.09.2023 yildan kuchga kirdi.
Lola Abduazimova
