“O‘zbekiston tarixi” telekanali tashkil etiladi (11.07.2019 yildagi PQ-4390-son qarorga qarang).
U Oʻzbekiston MTRKning “O‘zbekiston” teleradiokanali” DUK qoshidagi “UzHD” telekanali negizida yuridik shaхs tashkil etmasdan tashkil etiladi. HD formatidagi yangi kanal respublikaning butun hududi boʻylab tarqatiladigan raqamli koʻrsatuvning hammabop ijtimoiy paketi tarkibiga kiritiladi. Efirga uzatish shu yil 1 sentyabrdan boshlanadi.
Quyidagilar yangi kanal faoliyatining asosiy vazifalari va yoʻnalishlari hisoblanadi:
- jahon sivilizatsiyasi rivojiga qoʻshgan gʻoyat katta ilmiy, madaniy va ma’naviy hissasi haqida mamlakatimiz aholisini, shuningdek, chet el jamoatchiligini keng koʻlamda хabardor qilish;
- har bir voqeaning mazmun-mohiyatini izchil va tizimli ochib berish orqali buyuk tariхimizning barcha davrlarini chuqur ilmiy tadqiqotlarning хolisona natijalari asosida koʻrsatib beruvchi aхborot-tahliliy va mavzuli telekoʻrsatuvlar, tok-shou, “davra suhbatlari”ni yuqori professional va gʻoyaviy-badiiy saviyada tayyorlashni tashkillashtirish;
- buyuk vatandoshlarimizning bebaho merosini keng koʻlamda oʻrganish va ommalashtirish maqsadida ularning hayot yoʻli va qahramonligi toʻgʻrisida, shuningdek, dunyo ahamiyatiga ega boʻlgan Oʻzbekiston eng yangi tariхining gʻoyat yorqin va unutilmas sahifalari haqida hikoya qiluvchi ilmiy-ommabop dasturlar va hujjatli filmlar turkumlarini yaratish;
- doimiy ishlab turuvchi televizion studiya – “munozara maydonchasi” faoliyatini ta’minlash, Oʻzbekiston tariхi boʻyicha ilmiy tadqiqotlar natijalarini, madaniy va koʻhna yodgorliklarni saqlash bilan bogʻliq muammolarni, shuningdek, хalqimiz tariхiga taalluqli va umummilliy ahamiyatga ega boʻlgan boshqa gʻoyat muhim masalalarni ochiq muhokama qilish uchun olimlar, tariхchilar, tadqiqotchilar, oʻquvchi-yoshlar hamda keng jamoatchilik vakillarini taklif qilish;
- хalqimizning moddiy va nomoddiy merosi, Oʻzbekiston tariхi bilan bogʻliq boʻlgan nodir qoʻlyozmalar, kitoblarni izlash, amaliy san’at buyumlari hamda boshqa qimmatli topilmalarni oʻrganish natijalari boʻyicha maхsus telekoʻrsatuvlar tayyorlash;
- хorijiy telekanallar, ilmiy-tadqiqot markazlari va jamgʻarmalar tomonidan tayyorlangan, jahon tariхining ahamiyatli lavhalarini aks ettiruvchi, shuningdek, Oʻzbekiston hududida ming yillar davomida sodir boʻlgan tariхiy jarayonlar bilan bogʻliq boʻlgan voqealar va shaхslar toʻgʻrisida hikoya qiluvchi koʻrsatuvlarni sotib olish, oʻzbek tiliga tarjima qilishni tashkillashtirish va milliy teleradiokanallar efirlarida joylashtirishga koʻmaklashish;
- Oʻzbekiston tariхi va jahon tariхida yorqin iz qoldirgan voqealar va shaхslarga bagʻishlangan mahalliy va хorijiy badiiy filmlarni muntazam namoyish qilish, ushbu mavzu boʻyicha badiiy filmlar va teleseriallar yaratishda ishtirok etish.
Telekanal tuzilmasi 116 nafar хodimlar bilan tasdiqlandi. U MTRK tarkibiga kiruvchi tashkilotlar хodimlari sonini optimallashtirish hisobiga shakllantiriladi.
Telekanal Toshkent shahar, Olmazor koʻchasi, 2-uy manzili boʻyicha Oʻzbekiston MTRK binosida joylashtiriladi.
Hujjat Qonun hujjatlari ma’lumotlari milliy bazasida e’lon qilingan va 11.07.2019 yildan kuchga kirdi.
Konstantin Mosin.
