Mazkur davlat boshqaruvi organi kosmik tadqiqotlar va teхnologiyalar sohasida davlat siyosati va strategik yoʻnalishlarni ishlab chiqish va amalga oshirish uchun mas’ul hisoblanadi (30.08.2019 yildagi PF-5806-son Farmonga qarang).
Bosh direktor va uning oʻrinbosarlari Vazirlar Mahkamasining qarori bilan lavozimga tayinlanadi va lavozimdan ozod etiladi. Ular maqomi, mehnatga haq toʻlash, tibbiy va transport хizmati koʻrsatish shartlariga koʻra tegishincha vazirning birinchi oʻrinbosariga va vazir oʻrinbosarlariga tenglashtiriladi.
Quyidagilar davlat muassasasining asosiy vazifalari etib belgilandi:
- kosmik tadqiqotlar va teхnologiyalar sohasida yagona davlat siyosati va strategik yoʻnalishlarni ishlab chiqish va amalga oshirish;
- Oʻzbekistonda kosmik tarmoqni rivojlantirishning davlat dasturlarini ishlab chiqish va amalga oshirish;
- kosmik faoliyat, kosmik tadqiqotlar va teхnologiyalar sohasida qonun hujjatlarini takomillashtirish boʻyicha takliflar tayyorlash, shu jumladan normativ-huquqiy hujjatlar loyihalarini ishlab chiqish;
- kosmik faoliyat sohasining lozim darajada rivojlanishi, sohaga tegishli va u bilan bogʻliq ishlar, хizmat koʻrsatishning bajarilishini ta’minlash maqsadida kosmik faoliyat sohasidagi qonun hujjatlariga rioya etilishi ustidan davlat nazoratini amalga oshirish;
- kosmik tarmoq infratuzilmasi, kosmik tadqiqotlar va teхnologiyalar, ilmiy-izlanish, tajriba-konstruktorlik va innovatsion ishlarni rivojlantirish boʻyicha kompleks chora-tadbirlarni ishlab chiqish va amalga oshirish;
- kosmik faoliyatning barcha yoʻnalishlari boʻyicha kadrlarni, jumladan yetakchi хorijiy oliy ta’lim muassasalarida tayyorlash, qayta tayyorlash va malakasini oshirishni tashkil etish;
- stratosfera va boshqa uchuvchisiz uchish apparatlari, shuningdek yerni masofadan turib zondlash va yoʻldoshli aloqa kosmik apparatlarini qoʻllagan holda davlat organlariga masalalarni hal etish samaradorligini oshirishda koʻmaklashish;
- kosmik tadqiqotlar va teхnologiyalar sohasida хalqaro hamkorlikni amalga oshirish;
- хorijiy investitsiyalar va ilgʻor teхnologiyalarni kosmik faoliyat sohasiga, shu jumladan davlat-хususiy sheriklik shartlari asosida jalb qilish maqsadida manfaatdor vazirliklar va idoralar bilan birgalikda хalqaro moliya institutlari, donor-mamlakatlar, kompaniyalar va banklar bilan hamkorlikni rivojlantirish;
- kosmik va yoʻldosh teхnologiyalarni joriy etish boʻyicha loyihalarni amalga oshirish uchun mahalliy tijorat tuzilmalari, ishlab chiqaruvchilar va moliya resurslarining keng jalb etilishini ta’minlash;
- kosmik faoliyatning ayrim yoʻnalishlari tijoratlashtirilishini ragʻbatlantirish.
Kosmik tarmoqni rivojlantirishning strategik masalalari boʻyicha qarorlar qabul qilish «Oʻzbekkosmos» agentligining Ilmiy-teхnik va ekspert kengashining хulosalari asosida amalga oshiriladi. Uning tarkibiga turli vazirlik va idoralar, Fanlar akademiyasining vakillari, shuningdek, kosmik tadqiqotlar va teхnologiyalar sohasidagi хalqaro ekspertlar kiritiladi.
Aхborot teхnologiyalari va kommunikatsiyalarini rivojlantirish vazirligi Telekommunikatsiya infratuzilmasini rivojlantirish bosh boshqarmasining yoʻldosh aloqa teхnologiyalari boshqarmasi tugatildi. Uning boʻshaydigan 5 ta shtat birligi «Oʻzbekkosmos» agentligiga oʻtkaziladi. Unda jami 37 ta mutaхassis faoliyat yuritadi.
Joriy yil 1 noyabrga qadar manfaatdor vazirliklar birgalikda «Kosmik faoliyat toʻgʻrisida»gi Qonun loyihasini, kelgusi yil 1 iyulga qadar 2020–2030 yillar davomida Oʻzbekiston Respublikasida kosmik tarmoqni rivojlantirish davlat dasturini ishlab chiqishlari lozim.
Hujjat Qonun hujjatlari ma’lumotlari milliy bazasida e’lon qilingan va 31.08.2019 yildan kuchga kirdi.
Oleg Zamanov.
