Prezidentning 10.06.2021 yildagi «Vazirlar Mahkamasi faoliyatini takomillashtirishga oid qoʻshimcha chora-tadbirlar toʻgʻrisida»gi PQ-5143-son qarori qabul qilindi.
Hujjat Prezidentning 6.04.2021 yildagi PF-6199-son hamda 9.06.2021 yildagi PF-6244-son farmonlari, Prezidentning 3.04.2021 yildagi PQ-5053-son qarori ijrosini ta’minlash, shuningdek Vazirlar Mahkamasining ijro etuvchi tuzilmasini yanada takomillashtirish maqsadida qabul qilingan.
Vazirlar Mahkamasining ijro etuvchi tuzilmasida:
a) quyidagilar tugatiladi:
- Bosh vazirning maslahatchisi – sanoat va uning bazaviy tarmoqlarini hamda kooperatsiya aloqalarini rivojlantirish masalalari departamenti boshligʻi lavozimi;
- sanoat va uning bazaviy tarmoqlarini hamda kooperatsiya aloqalarini rivojlantirish masalalari departamenti;
- ta’lim, sogʻliqni saqlash, yoshlar, mahalla va oilani qoʻllab-quvvatlash masalalari kotibiyati;
b) Bosh vazirning maslahatchisi – Geologiya, energetika, sanoat va uning bazaviy tarmoqlarini rivojlantirish masalalari departamenti boshligʻi lavozimi kiritiladi;
v) quyidagilar tashkil etiladi:
- geologiya, energetika, sanoat va uning bazaviy tarmoqlarini rivojlantirish masalalari departamenti;
- ta’lim va sogʻliqni saqlash masalalari kotibiyati;
- yoshlar, jamoat tashkilotlari, mahalla va oilani qoʻllab-quvvatlash masalalari kotibiyati.
Vazirlar Mahkamasining boshqaruv хodimlari umumiy cheklangan soni 269 nafardan iborat boʻlgan yangilangan ijro etuvchi tuzilmasi tasdiqlandi.
Belgilanishicha:
- Ta’lim va sogʻliqni saqlash masalalari kotibiyati, Yoshlar, jamoat tashkilotlari, mahalla va oilani qoʻllab-quvvatlash masalalari kotibiyati hamda Ma’naviyat va davlat tilini rivojlantirish masalalari departamenti faoliyatini muvofiqlashtirish Bosh vazirning ijtimoiy rivojlantirish masalalari boʻyicha oʻrinbosari tomonidan;
- Turizm, sport, madaniyat va ommaviy kommunikatsiyalar masalalari kotibiyati hamda Madaniy merosni himoya qilish inspeksiyasi faoliyatini muvofiqlashtirish Bosh vazir oʻrinbosari – turizm va sport vaziri tomonidan amalga oshiriladi.
Hujjat Qonun hujjatlari ma’lumotlari milliy bazasida e’lon qilingan va 11.06.2021 yildan kuchga kirdi.
Elmira Siraziyeva.
