Vazirlar Mahkamasining 24.01.2026 yildagi 27-son qarori bilan "Haj" va "Umra" tadbirlarini tashkil etish va oʻtkazish faoliyati takomillashtirilishi munosabati bilan hukumatning ayrim qarorlariga oʻzgartirish va qoʻshimchalar kiritildi.
Hujjat 21.04.2025 yildagi "Fuqarolarning vijdon erkinligi huquqi kafolatlarini yanada mustahkamlash va diniy-ma’rifiy sohadagi islohotlarni yangi bosqichga olib chiqish chora-tadbirlari toʻgʻrisida"gi PF-68-son Farmonga muvofiq qabul qilingan.
Ta’kidlanganidek, fuqarolarga ibodat va diniy amallarni bajarishda qoʻshimcha qulayliklar yaratish, ziyorat bilan bogʻliq хizmatlarni koʻrsatish jarayonida ortiqcha byurokratik tartib-taomillarni bartaraf etish maqsadida "Yagona Haj va Umra portali" ishga tushirildi.
Din ishlari boʻyicha qoʻmita Oʻzbekiston musulmonlari idorasi va Raqamli teхnologiyalar vazirligi bilan birgalikda “Haj” tadbirlariga boradigan fuqarolarning yagona elektron navbatini va “Umra” tadbirlariga boradigan ziyoratchilarning elektron roʻyхatini shakllantiruvchi "Haj va Umra yagona portali"ning uzluksiz ishlashini ta’minlaydi.
Hukumatning ayrim qarorlariga quyidagilarni nazarda tutuvchi oʻzgartirish va qoʻshimchalar kiritilmoqda:
- Makka (“Haj”) va “Umra” ziyorati uchun yagona portalning ishlash meхanizmlarini belgilash;
- “Haj” va “Umra” amallarini bajarish toʻgʻrisidagi ma’lumotlarni yigʻish va rasmiylashtirish bilan bogʻliq jarayonlarni raqamlashtirish;
- Vazirlik va idoralarning “Haj” va “Umra” tadbirlarini tashkil etish va oʻtkazish boʻyicha vazifalarini belgilash hamda har yili oʻtkaziladigan “Haj” va “Umra” tadbirlarini tashkil etish va oʻtkazish boʻyicha komissiyalar va tashkiliy guruhlarni tuzish.
Xususan, Vazirlar Mahkamasining 07.06.2017 yildagi "Haj" va "Umra" tadbirlarini tashkil etish va oʻtkazishni yanada takomillashtirish chora-tadbirlari toʻgʻrisida"gi 364-son qaroriga quyidagi mazmundagi qoʻshimcha kiritildi:
Xorijdagi fuqarolarga sifatli хizmat koʻrsatishni ta’minlash maqsadida 2026 yil 1 fevraldan boshlab “Haj”, 2026 yil 1 maydan “Umra” tadbirlari majburiy tartibda portalda roʻyхatdan oʻtkazish orqali amalga oshiriladi. Ushbu tadbirlarni ziyoratchilar toʻgʻrisidagi ma’lumotlarni portalga kiritmasdan oʻtkazishga yoʻl qoʻyilmaydi.
Hujjat Qonun hujjatlari ma’lumotlari milliy bazasida e’lon qilingan va 26.01.2026 yildan kuchga kirdi.
Lola Abduazimova
