Урбанизация ва уй-жой бозорини барқарор ривожлантириш миллий қўмитаси ҳузуридаги Кадастр агентлиги директорининг буйруғи (02.06.2026 й. АВ рўйхат рақами 3843-сон) билан Кўчмас мулкни техник инвентаризациядан ўтказишни тайинлаш асослари ва кўчмас мулкни техник инвентаризациядан ўтказиш тартиби тўғрисидаги йўриқнома тасдиқланди.
Йўриқнома талаблари капитал қурилиш объекти ҳисобланмаган (шу жумладан, енгил конструкцияли) қурилмаларга нисбатан татбиқ этилмайди.
Кўчмас мулк қуйидаги мақсадларда техник инвентаризациядан ўтказилади:
- кўчмас мулкнинг кадастр йиғмажилдини шакллантириш;
- кўчмас мулкнинг чегараларини ва майдонларини аниқлаш;
- кўчмас мулкнинг таркибини аниқлаш;
- кўчмас мулкнинг техник тавсифларини ва фойдаланиш мақсадини аниқлаш;
- кўчмас мулкка бўлган ҳуқуқни белгиловчи ҳужжатлардаги маълумотлар билан тафовутларни аниқлаш;
- кўчмас мулкнинг ҳолати ва жорий ўзгаришларини аниқлаш.
Техник инвентаризациядан ўтказиш 2 турга бўлинади:
1) бирламчи (ер участкалари берилганда, реализация қилинганда; бино ёки иншоотлар қурилганда ва фойдаланишга қабул қилинганда; ажратилган ер участкасида қурилиши тугалланмаган объект мавжуд бўлганда; кўчмас мулк бўлинганда; кўчмас мулк бирлаштирилганда);
2) қайта (ер участкасининг чегараси, майдони ёки чегара нуқталари ўзгарганда; бино ва иншоотлар қайта қурилганда, реконструкция қилинганда; ер участкасида қўшимча бино ва иншоотлар қурилганда; қурилиши тугалланмаган объектларда қурилиш ишлари якунланиб, фойдаланишга қабул қилинганда).
Ҳужжат Қонун ҳужжатлари маълумотлари миллий базасида эълон қилинган ва 03.06.2026 йилдан кучга кирди.
Сардор Жумашов
