Президент 26 август куни аҳолини ижтимоий қўллаб-қувватлашга қаратилган қўшимча чора-тадбирлар тўғрисидаги қарорни имзолади.
Сентябрь ойида қуйидагиларга 500 минг сўм миқдорида бир марталик моддий ёрдам кўрсатилади:
- моддий ёрдам ва кўмакка муҳтож оилаларнинг рўйхатлари (“темир дафтар”)га киритилган оилаларнинг 16 ёшга тўлмаган болаларига;
- боқувчисини йўқотганлик пенсияси ёки нафақасини олувчи оилаларнинг 16 ёшга тўлмаган болаларига;
- ногиронлиги бўлган 16 ёшга тўлмаган болаларга.
Жами республика бўйича ушбу мақсадлар учун 427 729 млн сўм ажратилади (инфографикага қаранг). Пенсия жамғармаси, маҳаллий ҳокимиятлар, сектор раҳбарлари ҳамда Маҳалла ва оилани қўллаб-қувватлаш вазирлигининг ҳудудий бўлинмалари раҳбарлари, Молия вазирлиги, МБ ва тижорат банклари маблағларнинг олувчиларга ўз вақтида ва манзилли етказилиши учун жавоб беради.
Бундан ташқари, мамлакатимиздаги барча бошланғич, умумий ўрта таълим ва соғлиқни сақлаш муассасаларининг ходимларини марказлашган тартибда 1 октябрга қадар бепул гриппга қарши эмлашади. Ушбу банднинг ижросини таъминлаш Соғлиқни сақлаш вазирлигига топширилди.
Тўловлар ва эмлаш учун зарур маблағлар 30.07.2020 йилдаги ПФ-6038-сон Фармонда назарда тутилган ва қўшимча манбалар ҳисобидан ажратилади.
Олег Заманов.
