Ҳукумат «Андижон-фарм» ЭИЗ таркибига кирувчи ҳудудларни белгилади, унинг Дирекцияси ташкил этилди (ВМнинг 11.06.2019 йилдаги 480-сон қарори).
Эслатиб ўтамиз, «Андижон-фарм» ЭИЗ жорий йилнинг январь ойида юксак технологияли фармацевтика корхоналарини барпо этиш ва бозорни ўзимизда ишлаб чиқарилган сифатли дори воситалари билан тўлдириш лойиҳаларини амалга ошириш учун аввало Ҳиндистондан тўғридан-тўғри инвестицияларни жалб этиш мақсадида ташкил этилган.
«Андижон-фарм» ЭИЗ Дирекцияси давлат унитар корхонаси шаклида ташкил этилган. Дирекция бошқарув ходимларининг сони – 5 киши, устав фонди – 300 млн сўм. Ҳужжат билан унинг тузилмаси ва устави тасдиқланди.
Дирекция қуйидаги манзилда жойлашади: Андижон ш., Абдурауф Фитрат кўч., 239. Кейинчалик унинг учун замонавий маъмурий бино қурилади.
Шуни ҳам эслатиб ўтамизки, Дирекциянинг функциялари иқтисодий зоналарни ривожлантириш ва бошқариш тажрибасига эга бўлган хорижий, аввало Ҳиндистон компанияларига топширилиши мумкин (14.01.2019 йилдаги ПФ–5629-сон Фармонга қаранг).
Ҳужжат Қонун ҳужжатлари маълумотлари миллий базасида эълон қилинган ва 12.06.2019 йилдан кучга кирди.
