Вазирлар Маҳкамаси томонидан 17.03.2021 йилдаги «2021-2022 йилларда Тошкент шаҳри Бектемир туманини комплекс ижтимоий-иқтисодий ривожлантириш чора-тадбирлари тўғрисида»ги 147-сон қарор қабул қилинди.
Қуйидагилар Бектемир туманини комплекс ижтимоий-иқтисодий ривожлантириш чора-тадбирлари дастурини амалга оширишнинг асосий устувор йўналишлари этиб белгиланди:
- туманни ижтимоий-иқтисодий жиҳатдан янада ривожлантириш, аҳолининг, хусусан, хотин-қизлар, ёшлар ва кам таъминланган фуқаролар бандлигини таъминлаш орқали уларнинг даромадлари ва турмуш даражасини ошириш;
- кичик ва оилавий тадбиркорликни янада ривожлантириш учун қулай шарт-шароитлар яратиш;
- янги ишлаб чиқариш қувватларини ташкил этиш, мавжуд ишлаб чиқариш қувватларини модернизация қилиш бўйича қўшимча инвестиция лойиҳаларини амалга ошириш;
- саноат маҳсулотлари ишлаб чиқариш ҳажмларини кўпайтириш орқали солиқ базасини кенгайтириш;
- муҳандислик-коммуникация ва ижтимоий инфратузилмаларни ривожлантириш, аҳолининг тоза ичимлик суви, табиий газ, электр ва иссиқлик энергияси билан таъминланганлик даражасини ошириш ва бошқалар.
Ҳужжат билан қуйидагилар тасдиқланди:
- 2021-2022 йилларда Тошкент шаҳри Бектемир туманини комплекс ижтимоий-иқтисодий ривожлантириш чора-тадбирлари дастурининг мақсадли параметрлари ва молиялаштириш манбалари;
- 2021-2022 йилларда Тошкент шаҳри Бектемир туманида саноат, хизмат кўрсатиш соҳаларини ривожлантириш бўйича инвестиция лойиҳаларининг манзилли рўйхати;
- 2021-2022 йилларда Тошкент шаҳри Бектемир туманида йўл-транспорт инфратузилмаси тизимини ва электр энергияси, табиий газ, ичимлик суви ҳамда алоқа тармоқларини яхшилаш, кўп квартирали уйларнинг атрофларини ободонлаштириш чора-тадбирлари;
- 2021-2022 йилларда Тошкент шаҳри Бектемир туманида ижтимоий соҳа объектларини қуриш, реконструкция қилиш ҳамда мукаммал таъмирлаш чора-тадбирлари.
Ҳужжат Қонун ҳужжатлари маълумотлари миллий базасида эълон қилинган ва 18.03.2021 йилдан кучга кирди.
Лола Абдуазимова.
