Вазирлар Маҳкамасининг 16.01.2019 йилдаги “Халқаро молия институтлари маблағларидан фойдаланиш механизмини такомиллаштириш чора-тадбирлари тўғрисида” 40-сон қарори қабул қилинди.
Қачон давлат халқаро молия институтлари (ХМИ) ёки хорижий ҳукумат молия ташкилотларининг (ХҲМТ) маблағларини жалб қилса, иккита муаммо юзага келади:
- инвестиция лойиҳасининг лойиҳаолди ва лойиҳа ҳужжатларини ишлаб чиқиш учун ким тўловни амалга ошириши тўғрисидаги масалани ҳал қилиш чўзилиб кетади;
- лойиҳаолди ва лойиҳа ҳужжатларининг сифати пастлиги боис у бир неча марта ХМИ ёки ХҲМТ билан келишилган ҳолда қайта ишланади.
Буларнинг ҳаммаси инвестиция лойиҳаларини амалга оширишнинг кечикишига олиб келади.
Муаммони ҳал қилиш учун Вазирлар Маҳкамаси ҳузуридаги Ривожланиш давлат дастурларини молиялаштириш жамғармаси ХМИ ҳамда ХҲМТ маблағлари иштирокидаги инвестиция лойиҳаларининг лойиҳаолди ва лойиҳа ҳужжатларини ишлаб чиқиш бўйича харажатларни ўз зиммасига олади.
Жамғарма қуйидаги учта шартга риоя қилинган тақдирда пул ажратади:
- бюджет ташкилоти инвестиция лойиҳаси ташаббуси билан чиққан;
- инвестиция лойиҳаси Ўзбекистоннинг ХМИ ёки ХҲМТ билан ҳамкорлик стратегиясига (дастурига) киритилган;
- ҳужжатларни ишлаб чиқиш Инвестициялар бўйича давлат қўмитаси ва Молия вазирлиги билан келишилган лойиҳа ташаббускори - вазирлик ёки идоранинг ҳар йили тасдиқланадиган лойиҳа-қидирув ишларининг манзилли рўйхатида назарда тутилган.
ХМИ ёки ХҲМТ лойиҳаолди ёки лойиҳа ҳужжатларини ишлаб чиқишга грант тақдим этса (техник кўмаклашиш) ёхуд бу сумма инвестиция лойиҳасига жалб этиладиган ХМИ ёки ХҲМТ қарз маблағларига киритилган бўлса, Жамғарма маблағлари жалб этилмайди.
2019 йил 1 апрелга қадар Қурилиш вазирлиги Инвестиция лойиҳалари бўйича лойиҳа-қидирув ишларининг қийматини белгилаш тартиби тўғрисидаги низомни ишлаб чиқади.
Ҳужжат Қонун ҳужжатлари маълумотлари миллий базасида эълон қилинган ва 17.01.2019 йилдан кучга кирди.
Самир Латипов.
