Адлия вазирининг буйруғи (30.07.2025 й. АВ рўйхат рақами 3654-сон) билан давлат органлари ва ташкилотлари юридик хизмат ходимларининг норматив-ҳуқуқий ҳужжатлар ва уларнинг лойиҳаларини коррупцияга қарши экспертизадан ўтказиш фаолиятини баҳолаш услубиёти тасдиқланди.
Ҳужжат Президентнинг 22.10.2021 йилдаги "Норматив-ҳуқуқий ҳужжатлар ва уларнинг лойиҳаларини коррупцияга қарши экспертизадан ўтказишни янада такомиллаштириш чора-тадбирлари тўғрисида"ги ПҚ-5263-сон қарорига мувофиқ ишлаб чиқилган.
Услубиёт давлат органлари ва ташкилотлари юридик хизмат ходимларининг НҲҲ ва уларнинг лойиҳаларини коррупцияга қарши экспертизадан ўтказиш фаолиятини баҳолаш тартибини белгилайди.
Коррупцияга қарши экспертизани баҳолашнинг вазифалари:
- юридик хизмат ходимларининг масъулиятини кучайтириш;
- НҲҲ ва уларнинг лойиҳаларини коррупцияга қарши экспертизаси сифатини ошириш;
- юридик хизмат ходимлари фаолиятининг шаффофлигини таъминлаш.
НҲҲ ва уларнинг лойиҳаларини коррупцияга қарши экспертизадан ўтказиш натижаларини баҳолаш Адлия вазирлиги томонидан ҳар йили 20 январгача амалга оширилади.
Бунда қуйидагилар ҳисобга олинади:
- НҲҲ ва уларнинг лойиҳаларини коррупцияга қарши экспертизадан ўтказиш қамрови – 10 балл;
- экспертиза натижасида аниқланган коррупцияни келтириб чиқарувчи омилларнинг мувофиқлиги – 30 балл;
- коррупция пайдо бўлишига кўмаклашувчи барча омилларнинг акс эттирилганлиги – 50 балл;
- экспертиза натижаларини ОАВда чоп этилганлиги – 10 балл.
Коррупцияга қарши экспертизадан ўтказиш фаолиятини баҳолаш натижалари бўйича Адлия вазирлиги томонидан тегишли рейтинг шакллантирилади.
Шунингдек, "аъло" баҳо олган масъул давлат ташкилотлари юридик хизмат ходимларини рағбатлантириш ва "қониқарсиз" баҳо олган ходимлар фаолиятини самарадорлигини ошириш бўйича чоралар кўриш, уларга интизомий жазо қўллаш чоралари кўриб чиқилади.
Ҳужжат Қонун ҳужжатлари маълумотлари миллий базасида эълон қилинган ва 31.07.2025 йилдан кучга кирди.
Лола Абдуазимова
