Президентнинг 27.03.2026 йилдаги ПҚ-117-сон қарорида жазони ижро этиш муассасаларида ёшларни замонавий касбларга ўқитиш чора-тадбирлари белгиланган.
Озодликдан маҳрум қилиш жазосини ўтаётган 18 – 30 ёшдаги маҳкумларни замонавий рақамли касбларга ўқитишнинг асосий мақсадлари:
- тасдиқланган ўқув дастурлари доирасида билим олиш ва замонавий рақамли касбларни эгаллаш;
- замонавий рақамли касбларни эгаллаш учун зарур бўлган даражада хорижий тилларни (инглиз, рус, хитой ва бошқалар) ўргатиш;
- меҳнат бозорида талаб юқори бўлган касбларни эгаллаш учун унда меҳнат кўникмаларини шакллантириш ва мустаҳкамлаш;
- касбга йўналтириш орқали индивидуал ривожланиш, жамоада ишлаш ва мулоқот маданиятини шакллантириш.
Ушбу вазифаларни амалга ошириш учун «Иккинчи имкон» ижтимоий реабилитация миллий лойиҳаси амалга оширилади.
Лойиҳа доирасида биринчи босқичда 2026 йил 1 июндан бошлаб Тошкент, Навоий ва Қашқадарё вилоятларидаги жазони ижро этиш муассасаларида, 2027 йил 1 мартдан бошлаб республиканинг бошқа ҳудудларида ёшларни ўқитиш курслари йўлга қўйилади. Бунда:
- курслар 8 – 12 ойлик интенсив ўқув дастурлари асосида ташкил этилади;
- ўқишга ижтимоий хавфи катта бўлмаган, унча оғир бўлмаган ва оғир жиноятларни содир этган ёшлар жалб этилади, ахборот технологиялари ёрдамида жиноят содир этган шахслар бундан мустасно;
- ўқув курслари ишчи гуруҳ ўрганишлари натижасида аниқланган ёшларнинг қизиқишлари ва иқтидоридан келиб чиққан ҳолда гуруҳларга бўлинган ҳолда ташкил этилади;
- ўқув курслари якунлари бўйича тегишли дастурларни ўзлаштирган шахсларга сертификатлар электрон шаклда берилади.
Ҳужжат Қонун ҳужжатлари маълумотлари миллий базасида эълон қилинган ва 28.03.2026 йилдан кучга кирди.
Лола Абдуазимова
