Президентнинг 01.06.2026 йилдаги ПҚ-210-сон қарори билан тадбиркорлик лойиҳаларини қўллаб-қувватлаш орқали ёшлар бандлигини таъминлаш бўйича қўшимча чора-тадбирлар белгиланди.
2026-2028 йиллардаги мақсадли мўлжаллар:
• 300 мингдан ортиқ ёшлар вакилларини қамраб олиш, шу жумладан 100 мингга яқин қўшимча иш ўринларини яратиш;
• ёшларнинг ташаббусларини молиялаштириш ва ходимларининг аксарият қисмини ёшлар ташкил этадиган бизнес лойиҳаларни қўллаб-қувватлаш тизимини ривожлантириш.
"Ёшлар бизнеси" дастурларининг навбатдаги босқичи доирасида 2026-2028 йилларда АТ "Алоқабанк" 31 ёшгача бўлган жисмоний шахсларга суғурта полиси таъминоти ёки учинчи шахс кафиллиги остида имтиёзли микроқарзлар ажратади:
• ёшларга чет тили ва рақамли технологияларни ўргатиш, шунингдек, замонавий касб-ҳунар эгаллаш харажатларини молиялаштириш учун – 20 миллион сўмгача;
• замонавий касбларни эгаллаш ва касаначилик лойиҳалари учун – 50 миллион сўмгача;
• нон ёпиш, ширинликлар тайёрлаш ва сотиш лойиҳаларига – 100 миллион сўмгача.
Кўчма ёки енгил конструкцияли пунктлар ва нуқталарни ташкил этиш, йўловчиларни ташиш ва юкларни етказиб бериш лойиҳаларига мол-мулк гарови остида 300 млн сўмгача кредитлар ажратилади.
"Ёшлар учун иш ўринлари" лойиҳаси доирасида ёш якка тартибдаги тадбиркорларга 2 миллиард сўмгача, юридик шахсларга эса ишсиз ёшларни ишга қабул қилиш шарти билан 10 миллиард сўмгача 7 йил муддатга кредитлар ажратилади.
Худди шундай, "Ўзмиллийбанк" АЖ ҳам "Келажакка қадам" дастури доирасида "Келажак тадбиркорлари" лойиҳасини амалга ошириб, ёшларга турли миқдорларда имтиёзли кредитлар ажратмоқда.
Олий таълим муассасалари битирувчиларини касбга тайёрлаш жараёнларини ташкил этиш ва молиялаштириш учун "Ўзмиллийбанк" томонидан "Менинг биринчи касбим" дастури жорий этилади.
Банклар 2026-2027 йилларда дастурларни амалга ошириш учун Тикланиш ва тараққиёт жамғармаси ҳисобидан маблағ олади.
Ҳужжат Қонун ҳужжатлари маълумотлари миллий базасида эълон қилинган ва 01.06.2026 йилдан кучга кирди.
Лола Абдуазимова
