25.12.2025 йилдаги ЎРҚ-1104-сон Қонун билан Ўзбекистон Республикасининг айрим қонун ҳужжатларига хўжалик юритувчи субъектларни қўллаб-қувватлаш орқали аҳоли бандлигини таъминлаш ва юқори қўшилган қийматли товарлар ишлаб чиқаришни кенгайтиришга қаратилган ўзгартириш ва қўшимчалар киритилди.
Ҳужжатда тадбиркорликни ҳар томонлама қўллаб-қувватлаш, бозорда тенг шароитлар ва адолатли рақобат муҳитини таъминлаш, яширин иқтисодиёт улушини қисқартиришга қаратилган чора-тадбирлар белгиланган.
Қонун билан бир қатор қонун ҳужжатларига қуйидагиларга қаратилган қўшимча ва ўзгартишлар киритилмоқда:
- молиявий-иқтисодий фаолиятни амалга оширмаётган хўжалик юритувчи субъектларни тугатиш тартибини соддалаштириш;
- юқори технологиялар асосида ишлаб чиқаришни ривожлантириш;
- чорвачилик хўжаликларининг молиявий аҳволини яхшилаш;
- енгил саноат ва хизмат кўрсатиш соҳаси, ипотека бозори, шунингдек, фармацевтика ишлаб чиқарувчилари ва креатив парк резидентларини қўллаб-қувватлашга қаратилган солиқ имтиёзларини тақдим этиш.
Хусусан, Фуқаролик кодексига айланмадан олинадиган солиқ ёки қўшилган қиймат солиғи солинадиган якка тартибдаги тадбиркор молия-хўжалик фаолиятини амалга оширмаганлиги муносабати билан солиқ органининг аризасига асосан нофаол режимга ўтган кундан эътиборан бир йил ичида ўз фаолиятини тикламаган тақдирда, рўйхатдан ўтказувчи органнинг қарори билан реестрдан чиқарилиши мумкинлиги тўғрисида қўшимча киритилди.
Солиқ кодексига киритилган ўзгартиришларга кўра, тадбиркорлар:
- чакана савдо ва умумий овқатланиш;
- меҳмонхона бизнеси (жойлаштириш);
- автотранспорт воситаларида йўловчи ва юк ташиш;
- автотранспорт воситаларини таъмирлаш ва уларга техник хизмат кўрсатиш;
- компьютер хизматлари;
- маиший техникани таъмирлаш;
- қишлоқ хўжалиги ва ветеринария хизматлари;
- кўнгилочар марказлардаги хизматлар,
– ўттиз ёшга тўлмаган ходимларни ишга қабул қилганлар 2025 йил 1 январдан 2028 йил 1 январгача бўлган даврда уларга тўланган иш ҳақидан 1 фоиз ставкада ижтимоий солиқ тўлайди.
Мазкур имтиёз бир вақтнинг ўзида қуйидаги барча шартларга жавоб берадиган хўжалик юритувчи субъектларга нисбатан қўлланилади:
- ходимларнинг ўртача ойлик иш ҳақи МҲТЭКМнинг 2,5 бараваридан кам бўлмаган миқдорда ҳисобланади;
- кўрсатиб ўтилган фаолият турларини амалга оширишдан олинган даромад жорий ҳисобот (солиқ) даври охирида жами даромаднинг камида 60 фоизини ташкил этади.
Шунингдек, ходимлар сонини яшириш ҳолатлари аниқланган тақдирда, ушбу имтиёзнинг амал қилиши бекор қилинади.
Президент Фармони билан тасдиқланган рўйхатга мувофиқ, 2025 йил 1 январдан 2028 йил 1 январгача бўлган даврда янги боғлар ташаббускорлари хорижий давлатлардан (қўшни давлатлар бундан мустасно) пайвандланган мевали дарахтлар ва оналик материаллари ва техник ускуналарни олиб киришда ҚҚСдан озод этилади.
Қонунда бошқа ўзгартиш ва қўшимчалар ҳам назарда тутилган.
Ҳужжат Қонун ҳужжатлари маълумотлари миллий базасида эълон қилинган ва 25.12.2025 йилдан кучга кирди.
Лола Абдуазимова
