Вазирлар Маҳкамасининг 18.12.2017 йилдаги 993-сон қарори билан Ўзбекистон Республикаси Соғлиқни сақлаш вазирлиги ҳузуридаги Фармацевтика тармоғини ривожлантириш агентлиги тўғрисидаги низом (кейинги ўринларда – Агентлик) тасдиқланди.
Эслатиб ўтамиз, Агентлик Президентнинг 7.11.2017 йилдаги ПФ–5229-сон «Фармацевтика тармоғини бошқариш тизимини тубдан такомиллаштириш чора-тадбирлари тўғрисида»ги Фармони билан ташкил этилган. Янги идоранинг роли ва унинг ташкилий тузилмаси – шарҳда.
Низом билан Агентлик фаолиятини ташкил этиш, унинг асосий вазифалари ва функциялари, марказий аппаратининг тузилмаси белгиланди. Агентликка Президент томонидан лавозимга тайинланадиган ва ундан озод этиладиган директор бошчилик қилади. У мақоми бўйича соғлиқни сақлаш вазирининг биринчи ўринбосарига тенглаштирилади.
Идоранинг асосий вазифалари белгиланди
Унга қуйидагилар киради:
- дори воситалари, тиббий буюмлар ва тиббиёт техникасини давлат рўйхатидан ўтказиш ҳамда давлат соғлиқни сақлаш муассасалари учун уларнинг харидини ташкил этиш;
- ижтимоий дорихоналар тармоғини ташкил этиш;
- ижтимоий аҳамиятли дори воситалари ва тиббий буюмларга қатъий нархларни белгилашда иштирок этиш ва бошқалар.
Маълумот учун: Қайд этилган нархлар белгиланадиган ижтимоий аҳамиятга эга дори-дармон воситалари ва тиббиёт буюмлари рўйхати Президентнинг 31.10.2016 йилдаги ПҚ–2647-сон қарори билан тасдиқланган.
Унинг функциялари орасида – текширишларда иштирок этиш ва ишлаб чиқаришни тўхтатиб туриш
Агентлик, шунингдек, лицензия талаблари ва шартларига риоя қилиниши устидан назоратни амалга оширишда иштирок этади. Фармацевтика фаолияти билан шуғулланиш учун (дори воситалари ва тиббий буюмларнинг чакана савдоси бундан мустасно), шунингдек, гиёҳвандлик воситалари, психотроп моддалар ва прекурсорларнинг муомалада бўлиши билан боғлиқ фаолият учун лицензия олган тадбиркорлик субъектларини текширишда иштирок этилади.
Қуйидагиларни қайд этиш зарур:
1) Лицензия талаблари ва шартларига риоя этилиши устидан назоратни лицензияловчи орган – Соғлиқни сақлаш вазирлиги амалга оширади. Бинобарин, энди у мазкур функцияни Агентлик билан биргаликда бажаради.
2) Қуйидаги фаолият турларидан бирини амалга ошириш учун лицензияга эга бўлган субъектлар биргаликдаги текширишдан ўтказилиши лозим:
- дори воситаларини ва тиббий буюмларни ишлаб чиқариш, тайёрлаш, сифатини назорат қилиш, улгуржи реализация қилиш;
- уларни яратиш бўйича илмий-тадқиқот ишлари;
- доривор ўсимлик хом ашёсини қадоқлаш ва улгуржи реализация қилиш.
3) Лицензия талаблари ва шартлари Фармацевтика фаолиятини (дори воситалари ва тиббий буюмларни чакана реализация қилиш бундан мустасно) лицензиялаш тартиби тўғрисида низомда кўрсатилган.
4) Текширишлар қуйидаги шаклларда ўтказилиш мумкин:
- режали текширишлар;
- жисмоний ва юридик шахсларнинг қонун ҳужжатлари бузилганлиги фактлари тўғрисидаги мурожаатлари асосида Назорат қилувчи органлар фаолиятини мувофиқлаштирувчи республика кенгаши қарорига кўра қисқа муддатли текширишлар.
Шунингдек, Агентлик ўз ваколатлари доирасида дори воситалари ва тиббий буюмларнинг зарарли таъсири аниқланган тақдирда уларнинг ишлаб чиқарилишини, тайёрланишини, импортини ва реализация қилинишини тўхтатиб туриши мумкин.
Маълумот учун: мазкур ҳолатда тўхтатиб туриш суд тартибида амалга оширилади (ХПК 203-боб). Тўхтатиб туриш муддати ва улар юзага келгунча фаолият тўхтатиб туриладиган шартлар суд қарорида кўрсатилади.
Бу - муҳим! Агентликнинг қарорлари ташкилий-ҳуқуқий шаклларидан қатъи назар давлат ва хўжалик бошқаруви органлари, маҳаллий ижро этувчи ҳокимият органлари, хўжалик субъектлари томонидан бажарилиши мажбурий ҳисобланади.
Ҳужжат Қонун ҳужжатлари маълумотлари миллий базасида расман эълон қилинган ва 19.12.2017 йилда кучга кирди.
Мазкур ҳужжатнинг тўлиқ матни билан, у билан боғланган бошқа қонун ҳужжатларига шарҳлар ва ҳаволалар билан «Ўзбекистон Республикаси қонунчилиги» ахборот-қидирув тизимида танишиш мумкин.
Ленара Хикматова.
