Вазирлар Маҳкамасининг 29.04.2025 йилдаги "Давлат молияси соҳасида хавфларни бошқариш тизимини самарали ташкил этиш чора-тадбирлари тўғрисида"ги 279-сон қарори қабул қилинди.
Ҳужжат билан қуйидагилар тасдиқланди:
– Молиявий ва бошқа хавфларни аниқлаш, баҳолаш ва бошқариш тартиби тўғрисидаги низом, қуйидагиларни назарда тутувчи:
- республика ва маҳаллий ижро этувчи ҳокимият органларида молиявий ва бошқа хавфларни аниқлаш, баҳолаш ҳамда уларнинг реестри ва мониторингини юритиш;
- молиявий ва бошқа хавфларни камайтириш (олдини олиш, бартараф этиш) бўйича тизимли чора-тадбирларни амалга ошириш;
- молиявий хавфларни бошқариш соҳасида масъул ходимлар малакасини ошириб бориш.
Хавфларни бошқариш қўмитаси – хавфларни бошқариш мақсадида республика ва маҳаллий ижро этувчи ҳокимият органларининг биринчи раҳбарлари бошчилигида коллегиал асосда тузиладиган орган. Унинг вазифалари сифатида қуйидагилар белгиланган:
- хавфлар реестрини шакллантириш ва юритиш;
- хавфларнинг келиб чиқиш сабабларини таҳлил қилиш, уларни камайтириш, олдини олиш ва бартараф этиш чораларини кўриш;
- ички аудит хизматлари маълумотларини кўриб чиқиш;
- норматив ҳужжатлар ва қонунчиликни қўллаш амалиётида хавфларнинг юзага келишига имкон берадиган зиддиятларни бартараф этиш, тегишли нормаларни такомиллаштириш;
- хавфларни камайтиришнинг стратегик йўналишларини белгилаш ва бошқалар.
Ҳужжат Қонун ҳужжатлари маълумотлари миллий базасида эълон қилинган ва 30.04.2025 йилдан кучга кирди.
Лола Абдуазимова
