Президентнинг 2019 йил 2 августдаги тегишли ПҚ-4414-сон қарори имзоланди.
Қорақалпоғистоннинг Қўнғирот тумани, Жаслиқ қўрғонида жойлашган 19-сон ихтисослаштирилган жазони ижро этиш колонияси тугатилади. Бинолари, иншоотлари ва мавжуд мол-мулклари Қорақалпоғистон Республикаси ИИВнинг 2-сон тергов ҳибсхонасига ўтказилади.
Колония ходимлари ва ҳарбий хизматчиларининг эгаллаб турган лавозими бўйича пул таъминоти ва ижтимоий имтиёзлари уларнинг лавозимга қайта тайинланиши, контрактининг тугатилиши ёки пенсияга чиқишига қадар сақлаб қолинади. Маҳкумлар бир ой муддатда суд томонидан белгиланган тартиб турига мувофиқ равишда бошқа колонияларга юборилади (ЖИКнинг 45-52-моддаларига қаранг).
Қарор маҳкумларда қонунга итоаткор хулқ-атворни, шахс ва жамиятга ҳурмат муносабатини шакллантириш борасида амалга оширилаётган тадбирлар самарадорлигини ошириш, шунингдек давлатимизнинг халқаро майдонда ижобий имижини илгари суришга йўналтирилган.
Ҳужжат Қонун ҳужжатлари маълумотлари миллий базасида эълон қилинган ва 3.08.2019 йилдан кучга кирди.
Олег Заманов.
