Президентнинг 10.01.2019 йилдаги “Ўзбекистон Республикаси Иқтисодиёт ва саноат вазирлиги фаолиятини ташкил этиш тўғрисида” ПҚ-4105-сон қарори қабул қилинди.
Аввало, Лойиҳалар ва импорт контрактларини комплекс экспертиза қилиш маркази ташкил этилган Иқтисодиёт ва саноат вазирлиги тузилмасига ўтказилди (илгари ЛБМА қошида бўлган). Айни пайтда Марказда қандай ҳужжатлар экспертиза қилиниши лозимлиги, қайсилари ундан озод этилиши ҳақида – бу ерда.
Параллел равишда янги тартиб жорий этилмоқда, унга мувофиқ:
- устав фондида (капиталида) давлат улуши 50% ва ундан ортиқ бўлган юридик шахслар, шунингдек устав фондининг (капиталининг) 50%и ва ундан ортиғи шундай ташкилотларга тегишли бўлган юридик шахслар ҳар йили 1 декабрга қадар келгуси йилда жорий хўжалик фаолиятини таъминлаш учун моддий-техник ресурслар рўйхатини шакллантиради ва эълон қилади. Рўйхатлар кўрсатилган субъектларнинг кузатув кенгашлари розилиги билан давлат харидлари сайтида мажбурий тартибда шакллантирилади;
- 2020 йил 1 январдан бошлаб Рўйхат бўйича (капитал қўйилмалар бундан мустасно) товарлар (ишлар, хизматлар) давлат харидлари бўйича техник топшириқлар, контрактлар ва импорт контрактлари Марказда экспертизадан ўтказилмайди. Бунда давлат харидлари тўғрисидаги қонун ҳужжатлари талабларига риоя қилиш ва товарларнинг нархлари мувофиқлиги учун жавобгарлик бошқарув органларига юкланади;
- 2019 йил 1 февралдан бошлаб товарлар (ишлар, хизматлар) давлат харидлари бўйича техник топшириқлар нарх кўрсаткичларининг ўртача бозор даражасини ўрганиш натижалари бўйича дастлабки ҳисоб-китоблар асосида шакллантириладиган уларнинг чекланган қийматини белгилаган ҳолда экспертизадан ўтказиш учун Марказга тақдим этилади;
- контрактлар, импорт контрактлари ва уларга қўшимча келишувлар Марказда мажбурий экспертиза ва рўйхатдан ўтказилмайди. Тузилган контрактлар ва импорт контрактларининг техник топшириқларга мувофиқлиги, шунингдек уларнинг бажарилиши учун давлат буюртмачиси жавобгар бўлади;
- давлат буюртмачиси контрактларни, импорт контрактларини ихтиёрий равишда шартнома асосида экспертизадан ўтказиш учун Марказга тақдим этиши мумкин. Бунда товарлар (иш ва хизматлар) давлат харидига техник топшириқларни комплекс экспертизадан ўтказганлик учун ҚҚС ҳисобга олинмаган ҳолда давлат буюртмачиси томонидан белгиланган чекланган қийматнинг 0,1%и, лекин ЭКИҲнинг 100 баробаридан ортиқ бўлмаган миқдорда тўлов ундирилади.
2019 йил 1 мартга қадар Марказ томонидан лойиҳа олди, лойиҳа, тендер ҳужжатлари ва контрактларни экспертизадан ўтказишнинг янгиланган тартибини ҳамда “Давлат харидлари тўғрисида”ги Қонунга тузатишларни ишлаб чиқишлари керак.
Ҳужжат Қонун ҳужжатлари маълумотлари миллий базасида эълон қилинган ва 11.01.2019 йилдан кучга кирди.
Олег Заманов.
