Лицензиялаш-рухсат бериш ва хабардор қилиш тартиб-таомилларини такомиллаштириш билан боғлиқ бир қатор норматив ҳужжатларга ўзгартиришлар киритувчи 27.11.2025 йилдаги ЎРҚ-1099-сон Қонун қабул қилинди. Ҳужжат уч ой ўтгач кучга киради.
Қонун тартибга солишдаги – хусусан, жарималарни ихтиёрий тўлашда имтиёзларни қўллаш, жарима солиш тўғрисидаги қарорларни махсус электрон тизим орқали расмийлаштириш, шунингдек, лицензия ва рухсатномаларни олишда норезидент бўлган чет эл юридик шахслари билан ўзаро ҳамкорлик қилиш тартибидаги бўшлиқларни бартараф этиш мақсадида ишлаб чиқилган.
"Лицензиялаш-рухсат бериш ва хабардор қилиш фаолияти тўғрисида"ги, "Давлат божи тўғрисида"ги, "Енгил саноат тўғрисида"ги, "Экспорт назорати тўғрисида"ги, "Туризм тўғрисида"ги қонунларга, шунингдек Маъмурий жавобгарлик тўғрисидаги кодексга ва Божхона кодексига тузатишлар киритилди.
Ўзгартиришларга кўра, лицензияланадиган фаолият турлари рўйхатига илгари хабардор қилиш тартибида амалга ошириладиган ёнғин хавфсизлиги билан боғлиқ ишлар киритилди. Энди қуйидагилар учун лицензиялар талаб қилинади:
- автоматик ёнғин ўчириш ускуналарини ўрнатиш, созлаш, таъмирлаш ва техник хизмат кўрсатиш;
- ёнғин сигнализацияси қурилмаларини монтаж қилиш, созлаш, таъмирлаш ва техник хизмат кўрсатиш.
Қонун Ўзбекистон норезидентлари бўлган чет эл юридик шахслари томонидан аризалар бериш тартибини ҳам назарда тутади. Энди улар лицензия ва рухсат берувчи ҳужжатларни мамлакатда рўйхатдан ўтган доимий муассаса орқали олишлари мумкин бўлади.
Бунда ташқи иқтисодий фаолият ёки транзит ташишларда бир марталик ҳаракатлар учун зарур бўлган рухсат берувчи ҳужжатларни олиш учун доимий муассасани ҳисобга қўйиш талаб этилмайди.
Ҳужжат Қонун ҳужжатлари маълумотлари миллий базасида эълон қилинган ва 01.03.2026 йилдан кучга киради.
Лола Абдуазимова
