Маданият вазирлигининг штат бирликлари белгиланди

Эслатиб ўтамиз, Президентнинг 15.02.2017 йилдаги ПФ-4956-сон Фармони билан Маданият ва спорт ишлари вазирлиги иккита мустақил идорага қайта ташкил этилди: Маданият вазирлиги ҳамда Жисмоний тарбия ва спорт давлат қўмитаси (батафсил – бу ерда.)

Хусусан, Қарор билан қуйидагилар тасдиқланди:

• Маданият вазирлиги тизимининг ташкилий тузилмаси;
• Маданият вазирлиги марказий аппаратининг бошқарув ходимлари чекланган сони 49 кишидан иборат тузилмаси;
• Қорақалпоғистон Республикаси Маданият вазирлигининг тузилмаси, вилоятлар маданият бошқармалари ва Тошкент шаҳар маданият бош бошқармасининг намунавий тузилмаси;
• туманлар (шаҳарлар) маданият бўлимларининг намунавий тузилмаси;
• ҳудудий маданият органлари ходимларининг чекланган сони.

Бундан ташқари, Халқ ижодиёти ва маданий-маърифий ишлар республика илмий- методик маркази ва унинг ҳудудий марказлари, Республика методика ва ахборот маркази тугатилди. Унинг негизида Маданият вазирлиги ҳузурида қуйидаги давлат муассасалари ташкил этилди:

• Республика маданият муассасалари фаолиятини ташкил этиш илмий- методик маркази;
• Ахборот ва компьютер технологиялари маркази.

Шу билан бирга, Тошкент шаҳар ҳокимлиги тасарруфида бўлган «Истиқлол» ва «Туркистон» Санъат саройлари Маданият вазирлиги тасарруфига топширилади.

Маданият вазирлигининг марказий аппарати Тошкент шаҳри, Мустақиллик майдони, 5-уйда жойлаштирилди.

Мазкур ҳужжатнинг тўлиқ матни ва у билан боғланган бошқа қонун ҳужжатларига шарҳлар ва ҳаволалар билан яқин кунларда «Ўзбекистон Республикаси Қонунчилиги» ахборот-қидирув тизимида танишиш мумкин.

Олег ЗАМАНОВ,

экспертимиз.