Президентнинг 13.07.2017 йилдаги ПҚ-3132-сон «Маҳалла ифтихори» кўкрак нишонини таъсис этиш тўғрисида»ги қарори қабул қилинди. Бу ҳақда ЎзАда хабар берилади.
Кўкрак нишони билан жамиятимизда фуқароларнинг ўзини ўзи бошқариш органларининг ўрни ва ролини кучайтириш, жойларда маънавий муҳит барқарорлигини таъминлаш, миллатлараро дўстлик ва ҳамжиҳатликни мустаҳкамлаш, ёш авлодни она Ватанга муҳаббат ва истиқлол ғояларига садоқат руҳида тарбиялаш, аҳолини ижтимоий қўллаб-қувватлаш, кенг қамровли профилактика тадбирлари ва жамоатчилик назоратини амалга ошириш, маҳалла фуқаролар йиғинларининг моддий-техника базасини ривожлантириш ишларига муносиб ҳисса қўшиб келаётган фаол, ташаббускор фуқаролар ва жамоатчилик тузилмалари вакиллари тақдирланадилар.
Ушбу нишон билан Ўзбекистон фуқароси бўлмаган шахслар ҳам тақдирланиши мумкин. Кўкрак нишони билан тақдирланган шахслар ЭКИҲнинг 4 баравари миқдорида бир йўла тўланадиган пул мукофоти оладилар. Шунингдек у билан тақдирланганларга мамлакатимиз санаторийларида даволанишлари учун бир маротабалик бепул йўлланма олиш ҳуқуқи тақдим этилади.
«Маҳалла ифтихори» кўкрак нишонининг ўзи диаметри 34 миллиметрли доира шаклида бўлиб, мис қотишмасидан тайёрланади. У давлат мукофотларидан кейин кўкракнинг чап томонига тақилади. Кўкрак нишони билан бирга 160х110 миллиметр ўлчамдаги китобча шаклида бўлган, 240 г/кв.м. қалинликдаги офсет қоғоздан тайёрланган гувоҳнома берилади.
Кўкрак нишони, унинг гувоҳномаси ва пул мукофоти Мустақиллик куни байрами арафасида тантанали вазиятда топширилади. Такроран тақдирлаш амалга оширилмайди.
Мазкур ҳужжатнинг тўлиқ матни билан, у билан боғланган бошқа қонун ҳужжатларига шарҳлар ва ҳаволалар билан «Ўзбекистон Республикаси қонунчилиги» ахборот-қидирув тизимида танишиш мумкин.
Олег Заманов,
экспертимиз.
