Бу Президентнинг 2020 йил 26 майдаги ПҚ-4731-сон қарорида назарда тутилган.
Ҳужжатда «Олмалиқ кон-металлургия комбинати» АЖ конлари негизида рангли ва қимматбаҳо металлар ишлаб чиқаришни кенгайтиришнинг I босқичини (кейинги ўринларда – Лойиҳа) амалга ошириш белгиланган, у қуйидагиларни ўз ичига олади:
- 2020-2024 йилларда карьер қуриш, шунингдек йилига 60 млн тонна руда қазиб олиш ва қайта ишлаш қувватига эга бўлган 3-сон мис бойитиш фабрикаси объектларини лойиҳалаштириш, ускуналарни етказиб бериш ва қуриш билан бирга геологик қидирув ва конни ўзлаштириш бўйича кон-капитал ишларининг биринчи навбатини амалга ошириш;
- 2021-2025 йилларда йиллик ишлаб чиқариш ҳажмини 290 минг тонна катод миси, 38 тонна олтин ва 203 тонна кумушга етказган ҳолда, металлургия комплекси объектларини лойиҳалаштириш, ускуналарни етказиб бериш ва қуриш ишларининг иккинчи навбатини амалга ошириш.
Лойиҳани молиялаштириш манбалари қуйидагилар ҳисобланади:
- «Олмалиқ КМК» АЖнинг 250 млн АҚШ доллари миқдоридаги ўз маблағлари, шу жумладан 2020 йилда 35 млн АҚШ доллари;
- Тикланиш ва тараққиёт жамғармасининг (Жамғарма) Лойиҳа доирасида тузилган шартномаларни инобатга олган ҳолда сотиб олинадиган акцияларни ўрнатилган тартибда қўшимча эмиссия қилиш ҳисобига «Олмалиқ КМК» АЖ устав капиталига йўналтириладиган 1 млрд АҚШ доллари миқдоридаги маблағлар;
- маҳаллий ва халқаро молия институтлари консорциумининг 2021 йилдан бошлаб Лойиҳанинг техник-иқтисодий асоси (ТИА) ишлаб чиқилгандан ва якуний қиймати тасдиқланганидан сўнг жалб қилинадиган синдикатланган кредити маблағлари.
3-сон мис бойитиш фабрикасини қуриш учун бош пудратчи сифатида «тайёр ҳолда топшириш» (ЕРС) шартларида «Renaissance Heavy Industries» МЧЖ (Россия) қуйидаги шартномаларни тузиш орқали жалб этилади:
- биринчи контракт – 2020 йил охиригача инжиниринг ишлари, базавий лойиҳалаштириш, зарур капитал харажатлар ҳажми ва қийматини кафолатланган аниқликда белгилаш, шунингдек узоқ муддатда тайёр бўлувчи ускуналарни харид қилиш ва олдинроқ бошланадиган қурилиш ишларига бериш юзасидан;
- иккинчи контракт – ускуналарни етказиб бериш, қурилиш-монтаж ишларини бажариш ва 3-сон мис бойитиш фабрикасини «тайёр ҳолда топшириш» (ЕРС) шартларида фойдаланишга топшириш юзасидан. Ушбу контракт биринчи контракт доирасида капитал харажатлар қийматини аниқлаш якунларига кўра тузилади.
Лойиҳа доирасида «Renaissance Heavy Industries» компанияси инвестиция банклари ва консультантлар билан тузиладиган шартномаларга, шунингдек истисно тариқасида, бошқа импорт контрактларига нисбатан Иқтисодий тараққиёт ва камбағалликни қисқартириш вазирлиги ҳузуридаги Лойиҳалар ва импорт контрактларини комплекс экспертиза қилиш марказида мажбурий экспертиза ва рўйхатдан ўтказиш талаблари татбиқ этилмайди.
«Олмалиқ КМК» АЖга, истисно тариқасида, қуйидагиларга рухсат берилади:
- ТИА тасдиқлангунга қадар Лойиҳани молиялаштиришни амалга ошириш;
- концентратлар ва металлургия хом ашёсини зарарсиз асосда тўғридан-тўғри шартномалар (контрактлар) бўйича олиб кириш.
«SFI Management Group» МЧЖ ва «Олмалиқ КМК» АЖга Лойиҳани ўз вақтида ва сифатли амалга ошириш ҳамда Жамғарма маблағлари ва жалб этилаётган синдикатланган кредитдан мақсадли ва самарали фойдаланиш бўйича жавобгарлик юклатилади.
Ҳужжат Қонун ҳужжатлари маълумотлари миллий базасида эълон қилинган ва 27.05.2020 йилдан кучга кирди.
Эльмира Сиразиева.
