13.01.2026 йилдаги "Пиротехника буюмларининг муомаласи тўғрисида"ги ЎРҚ-1111-сон Қонун қабул қилинди. Ҳужжат уч ойдан кейин кучга киради.
Ҳужжат билан пиротехника буюмлари – пиротехника таркибининг ёниши (портлаши) ёрдамида оптик, акустик, электр ва бошқа визуал эффектларни яратишга мўлжалланган қурилмаларнинг эркин ва чекланган айланиши белгиланди.
Қонун билан пиротехника буюмларининг мақсади ва қўлланилиш соҳалари белгиланди, асосий тушунчалар ва уларнинг бешта хавфлилик синфи (I дан V гача) бўйича таснифи белгиланди.
Хусусан, хавфлилик даражаси I синфга мансуб пиротехника буюмларига хавфли зона радиуси 0,5 метрдан ошмайдиган бенгал чироқлари, стол усти фонтанлари, пақилдоқлар киради, улардан эркин муомалада фойдаланишга рухсат этилади.
Хавфлилик даражаси II синф бўлган пиротехника бу петардалар, кўча фонтанлари ва шунга ўхшаш хавфли зона радиуси 5 метргача бўлган, юқори хавфлилик манбаи ҳисобланган ҳамда жисмоний ва юридик шахслар томонидан ишлаб чиқариш, сақлаш, сотиш ва фойдаланиш бутунлай тақиқланган буюмлардир.
III синфга хавфли зона радиуси 20 метргача бўлган қурилмалар (пиротехник шарлар ва салют батареялари), IV синфга радиуси 20 метрдан ортиқ бўлган парк ёки баландлик мушакбозликлари ва салютлар, V синфга эса гидрометеорологик, қутқарув ва бошқа махсус мақсадларда қўлланиладиган буюмлар (ракеталар, сигнал чироқлари, темир йўл петардалари) киради.
II-V хавфлилик синфидаги пиротехника буюмларининг муомалада бўлиши тақиқланади, уларни ишлаб чиқариш ва улардан фойдаланиш мудофаа саноати давлат корхоналари томонидан амалга ошириладиган ҳоллар бундан мустасно.
Шунингдек, III-V хавфлилик даражасига эга пиротехника буюмларидан Президент ёки Вазирлар Маҳкамасининг қарорларига мувофиқ Мудофаа вазирлиги назорати остида ташкил этилган оммавий мушакбозлик тадбирларини ўтказиш, саноат ва ҳарбий мақсадларда фойдаланишга рухсат берилади.
Пиротехника буюмлари муомаласи устидан давлат назорати Миллий гвардия, ички ишлар органлари ва божхона хизматлари зиммасига юклатилган бўлиб, улар пиротехника буюмларини ноқонуний ишлаб чиқариш, олиб кириш, сақлаш ва сотиш ҳолатларини аниқлаш ва уларга чек қўйиш, айбдорларни жавобгарликка тортиш мажбуриятини олган.
Қонун билан пиротехникадан ноқонуний фойдаланганлик учун маъмурий жавобгарлик кучайтирилмоқда − жарима миқдори БҲМнинг 5−20 бараваридан 15−25 бараваригача оширилди.
Ҳужжат билан "Ички ишлар органлари тўғрисида"ги, "Қурол тўғрисида"ги, "Давлат божи тўғрисида"ги ва "Лицензиялаш, рухсат бериш ва хабардор қилиш тартиб-таомиллари тўғрисида"ги қонунларга тегишли ўзгартиришлар киритилди.
Ҳужжат Қонун ҳужжатлари маълумотлари миллий базасида эълон қилинган ва 14.04.2026 йилдан кучга киради.
Лола Абдуазимова
