Соғлиқни сақлаш вазирининг буйруғи билан ( 09.09.2026 й. АВ рўйхат рақами 3936-сон) Карантинли ва инсон учун хавфли бўлган бошқа юқумли касалликлар тарқалиши хавфи мавжуд бўлганда аҳолини профилактик эмлашдан ўтказиш тартиби тўғрисидаги низом тасдиқланди.
Низом ушбу ҳудудда юқумли касаллик аниқланганда, у фаол тарқала бошлаганда ёки аҳолининг маълум қатламларига юқиш эҳтимоли мавжуд бўлганда зарур бўладиган профилактик эмлаш қоидаларини белгилайди.
"Фуқаролар соғлиғини сақлаш тўғрисида"ги қонунга мувофиқ, эмлашни жорий этиш тўғрисидаги қарор Бош давлат санитария врачи томонидан қабул қилинади. Қарорда қуйидагилар кўрсатилади:
- юқумли касалликнинг номи ва профилактик эмлашни жорий этиш учун асос;
- профилактик эмлашнинг мақсади;
- профилактик эмлаш ўтказиладиган ҳудуд;
- профилактик эмлаш ўтказиладиган шахслар гуруҳлари;
- қўлланиладиган вакцина тури;
- профилактик эмлашнинг бошланиши ва тугаш санаси;
- профилактик эмлашни ташкил этувчи ва амалга оширувчи давлат соғлиқни сақлаш тизими муассасалари;
- ҳудудий санитария-эпидемиология органлари.
Эмлашда юқтириш ва бошқаларга юқтириш хавфи юқори бўлган шахсларга устуворлик берилади.
Эмлаш мақсадида фақат давлат рўйхатидан ўтган ва қўллаш учун маъқулланган препаратлардан фойдаланишга рухсат берилади.
Эмлашдан олдин беморга вакцина, унга нисбатан юзага келиши мумкин бўлган реакциялар, кейинги кузатув тартиби ва эмлашдан бош тортишнинг ҳуқуқий оқибатлари ҳақида тўлиқ маълумот берилиши керак. Ҳар бир эмланган шахс ҳақидаги маълумотлар Ягона тиббий ахборот тизимига киритилади.
Ҳужжат Қонун ҳужжатлари маълумотлари миллий базасида эълон қилинган ва 10.09.2026 йилдан кучга кирди.
Лола Абдуазимова
