Вазирлар Маҳкамасининг 24.11.2022 йилдаги “Статистика маълумотларини тақдим этиш бўйича давлат хизматларини кўрсатишнинг маъмурий регламентини тасдиқлаш тўғрисида”ги 672-сон қарор қабул қилинди.
Ҳужжат билан иқтисодий, демографик, ижтимоий, молиявий, экологик хусусиятга ҳамда бошқа хусусиятга эга статистика маълумотларини тақдим этиш бўйича давлат хизматларини кўрсатишнинг маъмурий регламенти тасдиқланган бўлиб, унга кўра:
- жисмоний шахс/юридик шахснинг вакили Давлат хизматлари маркази ёки ЯИДХПга мурожаат қилади;
- мурожаат этган шахс ўзи ҳақида ва сўралаётган статистик маълумотлар ҳақида ахборот тақдим этади (номи, даври ва бошқалар);
- буюртма келиб тушганидан сўнг икки кун ичида мурожаат этувчининг шахсий кабинетига (ёки смс орқали) сўралаётган статистик маълумотлар мавжудлиги ва хизмат нархи ҳақида хабарнома келади;
- ҳар бир статистик маълумотни шакллантириш учун БҲМнинг 0,08% миқдорида йиғим ундирилади (ЯИДХП орқали мурожаат этилганда 10 % чегирма, “Ижтимоий ҳимоя ягона реестри» тизимида рўйхатга олинган шахслар, шунингдек, I ёки II гуруҳ ногиронлиги бўлган шахслар мурожаат этганда – 50 % чегирма мавжуд);
- Йиғим тўлангандан сўнг Давлат статистика қўмитаси 5 кун ичида сўралаётган статистик маълумотларни QR-код билан тасдиқлаб мурожаатчига юборади.
Регламентга мувофиқ статистик маълумотларни тақдим этиш фақатгина қуйидаги ҳолатларда рад этилади:
- таркибида давлат сирлари ва қонунчилик билан қўриқланадиган бошқа сир бўлган, шунингдек индивидуал маълумотларни сўраш;
- шакллантирилиши статистика дастурида назарда тутилмаган ёки шакллантириш муддати ҳали келмаган статистика маълумотларини сўраш.
Ҳужжат Қонунчилик маълумотлари миллий базасида эълон қилинган ва 25.11.2022 йилдан кучга кирди.
Собир Нурбердиев.
