Вазирлар Маҳкамасининг 13.08.2025 йилдаги 513-сон қарори билан республика ҳудудига кириб келган ва яроқсиз ҳолга келган маҳсулотларни божхона органлари ва бошқа ваколатли органлар томонидан утилизация қилиш тартиби соддалаштирилди.
Ҳужжатга кўра:
- Ўзбекистон ҳудудига олиб кирилган ва яроқсиз ҳолга келган товарлар уларни утилизация қилишда, шунингдек "давлат фойдасига воз кечиш" божхона режимида расмийлаштиришда умидсиз қарз деб эътироф этилади;
- ташқи савдо контрактлари бўйича умидсиз қарздорликни ҳисобдан чиқариш тартиб-таомиллари электрон шаклда амалга оширилади;
- Ўзбекистон ҳудудига олиб кирилган ва яроқсиз ҳолга келган товарларни утилизация қилиш тўғрисидаги хулоса "Ягона дарча" божхона ахборот тизими орқали берилади.
2026 йил 1 июлдан бошлаб ташқи савдо шартномалари бўйича умидсиз қарздорликни ҳисобдан чиқариш тартиби "E-kontrakt" ташқи савдо фаолияти ахборот тизими орқали электрон шаклда амалга оширилади.
Ташқи савдо операцияларининг ягона электрон ахборот тизимида умидсиз қарзларни ҳисобдан чиқариш тартиби тўғрисидаги низомга (14.04.2021 й. 216-сон ВМҚ) тегишли ўзгартиришлар киритилмоқда.
Ҳужжат Қонун ҳужжатлари маълумотлари миллий базасида эълон қилинган ва 14.08.2025 йилдан кучга кирди.
Лола Абдуазимова
