Ташқи савдони янада либераллаштиришга, қонунчиликни халқаро нормаларга уйғунлаштиришга қаратилган "Ўзбекистон Республикасининг айрим қонун ҳужжатларига қўшимча ва ўзгартиришлар киритиш тўғрисида"ги 27.11.2025 йилдаги ЎРҚ-1097-сон Қонун қабул қилинди. Ҳужжат уч ой ўтгач кучга киради.
Қонун билан "Акциядорлик жамиятлари ва акциядорларнинг ҳуқуқларини ҳимоя қилиш тўғрисида"ги Қонунга акциядорлик жамиятлари ижро этувчи органлари ва кузатув кенгашлари аъзоларининг фидуциар мажбуриятларини, мажоритар акциядорларнинг умумий мажбуриятларини аниқлаштиришга ҳамда ушбу мажбуриятлар бўйича жавобгарликни белгилашга қаратилган ўзгартиш ва қўшимчалар киритилмоқда.
Маълумот учун: фидуциар мажбуриятлар (ишонч мажбуриятлари) – бу бир тарафнинг (фидуциарнинг) бошқа тарафнинг (бенефициарнинг) энг яхши манфаатларини кўзлаб ҳаракат қилиш бўйича юридик мажбуриятлари. Бу фидуциарнинг бенефициар олдидаги алоҳида ишонч ва масъулиятидан келиб чиқади.
Бундан ташқари, Қонун билан Божхона кодексига энг кўп қулайлик бериш режимига эга бўлмаган мамлакатлардан Ўзбекистонга келтирилаётган товарлар учун товарнинг келиб чиқиши тўғрисидаги сертификатлар мавжуд бўлмаганда импорт божини икки карра ошириб қўллаш амалиёти бекор қилинишини назарда тутувчи ўзгартиришлар киритилмоқда.
Қайд этилишича, Қонун акциядорлик жамиятлари бошқарув органлари ва мажоритар акциядорларининг жамият ва бошқа акциядорлар манфаатларини кўзлаб, ҳалол ва оқилона иш олиб боришини таъминлашга, уларнинг масъулиятини оширишга, шунингдек, миллий қонунчиликни Жаҳон савдо ташкилоти қоидаларига мувофиқлаштириш орқали адолатли савдони таъминлашга ҳамда импорт ва экспорт кўламини кенгайтиришга қаратилган.
Ҳужжат Қонун ҳужжатлари маълумотлари миллий базасида эълон қилинган ва 28.02.2026 йилдан кучга киради.
Лола Абдуазимова
