Президентнинг 30.06.2017 йилдаги ПҚ-3105-сон “Ўзбекистон Республикаси Фанлар академияси ҳузурида Ўзбекистоннинг энг янги тарихи бўйича Жамоатчилик кенгаши фаолиятини ташкил этиш тўғрисида”ги қарори қабул қилинди.
Жамоатчилик кенгаши Ўзбекистоннинг энг янги тарихини тадқиқ этиш ва ўқитиш самарадорлигини ошириш мақсадида ташкил этилади.
Қуйидагилар кенгашнинг асосий вазифалари ҳисобланади:
- Ўзбекистоннинг энг янги тарихини ўрганишни ташкил этиш, Ўзбекистоннинг энг янги тарихи бўйича долзарб муаммоларни ишлаб чиқиш, ўзбек халқининг тарихий ўтмиши ва бугунги кунига баҳо беришда бир ёқлама ёндашувларга, ақидапарастликка йўл қўймаслик ишларини мувофиқлаштириш;
- демократик ҳуқуқий давлат ва фуқаролик жамиятини шакллантиришнинг «ўзбек модели» моҳияти ва мазмунини чуқур ўрганиш ва яққол очиб бериш;
- илмий, ўқув, ўқув-методик адабиётларни тайёрлаш ва чоп этиш ишларини амалга ошириш;
- Ўзбекистоннинг энг янги тарихи бўйича илмий, ўқув ва ўқув-методик адабиётлар, ўқув дастурлари мониторингини олиб бориш;
- Ўзбекистон тарихи бўйича замонавий чет эл илмий ва ўқув адабиётларини ўрганишга йўналтирилган чора-тадбирларни кўриш.
Фанлар академияси ҳузуридаги Ўзбекистоннинг энг янги тарихи масалалари бўйича Мувофиқлаштирувчи-методик марказ Жамоатчилик кенгашининг ишчи органи ҳисобланади.
Марказ директори Фанлар академияси президенти томонидан Вазирлар Маҳкамаси билан келишган ҳолда лавозимга тайинланади ва озод этилади. Марказни молиялаштириш Давлат бюджети ҳисобидан амалга оширилади.
Кенгашнинг ҳуқуқлари:
- давлат ва хўжалик бошқаруви органларидан белгиланган тартибда зарур ахборот ва материалларни олиш;
- энг янги тарихнинг энг муҳим йўналишларини ўрганиш бўйича эксперт гуруҳларини тузиш;
- энг янги тарих бўйича етакчи хорижий тадқиқот муассасалари билан ҳамкорликни амалга ошириш;
- Кенгаш ваколатига кирадиган масалалар бўйича ихтисослаштирилган бюллетенлар нашр қилиш.
Кенгашга бир вақтнинг ўзида Фанлар академиясининг ижтимоий-гуманитар фанлар бўйича вице-президенти ҳисобланадиган раис бошчилик қилади. Кенгаш мажлиси чоракда камида 1 марта ўтказилади.
Кенгаш қарорлари унинг мажлисларида Кенгаш аъзоларининг оддий кўпчилик овози билан қабул қилинади ва Кенгаш раиси тасдиқлагандан кейин кучга киради.
Ҳужжат билан шунингдек Ўзбекистоннинг энг янги тарихи масалалари бўйича Мувофиқлаштирувчи-методик марказнинг тузилмаси ва ходимлар меҳнатига ҳақ тўлаш разрядлари тасдиқланди.
Мазкур ҳужжатнинг тўлиқ матни билан, у билан боғланган бошқа қонун ҳужжатларига шарҳлар ва ҳаволалар билан «Ўзбекистон Республикаси қонунчилиги» ахборот-қидирув тизимида танишиш мумкин.
Моҳина Мирзаева.
